‘तिघी’मध्ये आजवरची सर्वोत्तम भूमिका केल्याचे समाधान

‘तिघी’ या चित्रपटातील ज्येष्ठ अभिनेत्री भारती आचरेकर यांनी साकारलेल्या आईच्या भूमिकेला प्रेक्षकांकडून भरभरून दाद मिळत आहे. ५७ वर्षांच्या कारकिर्दीत प्रामुख्याने विनोदी भूमिकांसाठी ओळखल्या जाणाऱ्या भारती आचरेकर यांनी या चित्रपटात एका कणखर, भावनिक आणि अंतर्मुख करणाऱ्या आईची भूमिका साकारली आहे. नेहा पेंडसे बायस आणि सोनाली कुलकर्णी यांच्या आईच्या भूमिकेत त्यांनी आई-मुलींच्या नात्यातील गुंतागुंतीचे भावविश्व प्रभावीपणे उभे केले आहे. दिग्दर्शिका जीजिविषा काळे यांनी त्यांच्यातील वेगळेपण ओळखून ही भूमिका दिली, याबद्दल भारती आचरेकर यांनी समाधान व्यक्त केले आहे.

‘तिघी’ चित्रपट प्रदर्शित झाल्यानंतर प्रेक्षकांकडून आणि मित्रपरिवाराकडून भारती आचरेकर यांना खूप चांगला प्रतिसाद मिळत आहे. सोशल मीडियावरही त्यांच्या अभिनयाचे कौतुक होत आहे. विशेषतः त्यांनी साकारलेली आईची भूमिका प्रेक्षकांच्या मनाला भिडली आहे. या भूमिकेमुळे भारती आचरेकर यांनी आपल्या अभिनयाचा एक नवा पैलू प्रेक्षकांसमोर आणला आहे.

या भूमिकेबद्दल बोलताना भारती आचरेकर म्हणाल्या, “प्रेक्षकांना चित्रपट आवडत आहे, याचा मला खूप आनंद वाटत आहे. मित्रपरिवार, इंडस्ट्रीतील सहकाऱ्यांकडून मला फोन आणि मेसेजेस येत आहेत. माझ्या भूमिकेवर ते भरभरून प्रेम करत आहेत आणि कौतुकही करत आहेत.”

त्या पुढे म्हणाल्या, “फार कमी वेळा असं होतं की, आपलं काम पाहिल्यानंतर स्वतःलाच समाधान वाटतं. मी स्वतःला या भूमिकेत पडद्यावर पाहिलं तेव्हाच मला जाणवलं की, माझं हे काम खरंच छान झालं आहे. मला हा रोल देताना दिग्दर्शिकेने फार धाडस केलं. लोकांना मी विनोदी अभिनेत्री म्हणून माहीत आहे, परंतु जीजिविषा काळेला माझ्यात वेगळं काही दिसलं, याचा मला खूप आनंद आहे.”

भारती आचरेकर यांनी मराठी चित्रपटसृष्टीत ५७ वर्षे सातत्याने काम केले आहे. त्या म्हणाल्या, “मराठी चित्रपटासाठी मला फारसं कोणी विचारलं नव्हतं. त्यामुळे या भूमिकेसाठी निवड होणं माझ्यासाठी खूप खास आहे. तिने माझ्याकडून ही भूमिका अक्षरशः काढून घेतली. सगळ्यांनी दिलेल्या विश्वासामुळे मी तो रोल जगले.”

त्यांनी आपल्या कारकिर्दीतील या भूमिकेबद्दल बोलताना सांगितले की, “इतक्या वर्षांच्या कारकिर्दीनंतर ‘तिघी’मधील भूमिका करताना मला वेगळंच समाधान मिळालं. मला असं वाटतं की, माझ्या आजवरच्या कारकिर्दीतील ही सर्वोत्कृष्ट भूमिका आहे.”

‘तिघी’ या चित्रपटाचे दिग्दर्शन जीजिविषा काळे यांनी केले आहे. सुप्री मीडिया प्रस्तुत आणि कोक्लिको पिक्चर्स निर्मित या चित्रपटात भारती आचरेकर यांच्यासोबत सोनाली कुलकर्णी आणि नेहा पेंडसे बायस यांनी प्रमुख भूमिका साकारल्या आहेत. निखिल महाजन, सुहृद गोडबोले, स्वप्निल भंगाळे आणि नेहा पेंडसे बायस यांनी या चित्रपटाची निर्मिती केली आहे. हा चित्रपट सध्या सर्वत्र प्रदर्शित झाला आहे आणि प्रेक्षकांना खूप आवडत आहे.