क्रिस्टोन स्कूलचा ‘एमआयटी’वर विजय

विश्वनाथ स्पोर्ट्स मीट क्रिकेट स्पर्धेत क्रिस्टोन स्कूल ऑफ इंजिनीअरिंग संघाने एमआयटी स्कूल ऑफ इंजिनीअरिंग संघावर १०६ धावांनी दणदणीत विजय मिळवला. तेजस आरेकरी आणि मोहन कदम यांच्या अर्धशतकी खेळी आणि प्रणव टांकसाळच्या भेदक गोलंदाजीमुळे क्रिस्टोन संघाने हा विजय खेचून आणला. दुसऱ्या सामन्यात डी. वाय. पाटील संघाने सरहद कॉलेजवर ५८ धावांनी मात केली. ख्रिस फर्नांडिसने अवघ्या १८ चेंडूंमध्ये ४९ धावांची वादळी खेळी करत संघाच्या विजयात मोलाची भर घातली.

क्रिस्टोन स्कूल ऑफ इंजिनीअरिंग संघाने प्रथम फलंदाजी करताना १६ षटकांत ४ गडी गमावून १६५ धावा केल्या. यात तेजस आरेकरीने ६२ धावांची तर मोहन कदमने नाबाद ५६ धावांची महत्त्वपूर्ण खेळी केली. एमआयटी स्कूल ऑफ इंजिनीअरिंग संघाचा डाव ५९ धावांवर सर्वबाद झाला. प्रणव टांकसाळने ४ बळी घेत एमआयटी संघाला रोखले.

दुसऱ्या सामन्यात डी. वाय. पाटील संघाने ९ गडी गमावून १५७ धावा केल्या. ख्रिस फर्नांडिसने १८ चेंडूंमध्ये ४९ धावांची तुफानी खेळी केली. विश्वजित पाटीलने ४ बळी घेतले. सरहद कॉलेजचा संघ १४ षटकांत ७ गडी गमावून ९९ धावाच करू शकला. प्रतीक खेडकरने ३१ आणि पवन राठोडने २१ धावा केल्या. ध्रुव गवळीने २ बळी घेतले.

या स्पर्धेत व्हीआयटी पी.व्ही.पी.सी.ओ.ए. संघाचा ख्रिस्त कॉलेजकडून पराभव झाला. व्हीआयटी पी.व्ही.पी.सी.ओ.ए. संघ ७८ धावांवर सर्वबाद झाला. रूज सम्यकने २२ धावा केल्या. यश जाधवने ४ बळी तर ओवेस अन्सारीने २ बळी घेतले. ख्रिस्त कॉलेजने अभिषेक राठोडच्या नाबाद ३१ आणि अन्सारीच्या नाबाद ३० धावांच्या जोरावर बिनबाद ८१ धावा करत सामना जिंकला.