खामेनींसाठी काश्मीरमध्ये निदर्शने
Contributed by: श्रीनगर|महाराष्ट्र टाइम्स•
इराणचे सर्वोच्च नेते अयातुल्ला अली खामेनी यांच्या हत्येविरोधात काश्मिरमध्ये सोमवारी दुसऱ्या दिवशी निदर्शने झाली. लाल चौक, सैदा कदल, बडगाम, बंदिपोरा, अनंतनाग आणि पुलवामा येथे मोठ्या संख्येने लोक रस्त्यावर उतरले. निदर्शकांनी अमेरिका आणि इस्रायलविरोधात घोषणाबाजी केली. काही ठिकाणी सुरक्षा दलांनी सौम्य बळाचा वापर केला.
काश्मीरमधील अनेक भागांमध्ये, विशेषतः श्रीनगरमधील बेमिना, गुंड हस्सी भट आणि जहांगीर चौक तसेच दक्षिण काश्मिरमधील पुलवामा शहरात शेकडो लोक रस्त्यावर जमले होते. त्यांनी तीव्र संताप व्यक्त करत अमेरिका आणि इस्रायलविरोधी घोषणा दिल्या. या आंदोलनादरम्यान, निदर्शक छाती पिटतानाही दिसले.एका अधिकाऱ्याने दिलेल्या माहितीनुसार, काश्मीरमध्ये सुमारे १५ लाख शिया लोकसंख्या आहे आणि या समुदायाने मोठ्या संख्येने निदर्शनांमध्ये सहभाग घेतला. सुरक्षा दलांनी परिस्थिती नियंत्रणात आणण्यासाठी आवश्यक ती कारवाई केली.
