Nagpur Marbat Festival: ‘टेरिफ ट्रम्प’ला घेऊन जा गे... नागपुरात मारबतला आव्हान; पाकिस्तान, दहशतवाद्यांच्या बडग्या काढून निषेध| Maharashtra Times

निखिल भुते, नागपूर : उपराजधानीचे सांस्कृतिक वैभव असलेल्या ‘मारबत-बडग्या उत्सव’ शनिवारी उत्साहात साजरा करण्यात आला. ‘टेरिफ ट्रम्पला घेऊन जा गे मारबत’ अशा घोषणा देत भारतावर आयातशुल्क लावणारे अमेरिकेचे राष्ट्राध्यक्ष डोनाल्ड ट्रम्प यांचा बडग्या काढून निषेध व्यक्त करण्यात आला. याशिवाय, ‘ऑपरेशन सिंदूर’च्या पार्श्वभूमीवर पाकिस्तान व पहलगाम येथे निष्पाप पर्यटकांची हत्या करणाऱ्या दहशतवाद्यांवर बडग्याच्या माध्यमातून निशाणा साधला.

शंभराहून अधिक वर्षांची परंपरा असलेल्या मारबत उत्सवाला दरवर्षीप्रमाणे यंदाही लाखोंची गर्दी होती. उत्सवादरम्यान जागनाथ बुधवारी येथून तऱ्हाणे तेली समाजाची १४१ वर्षे जुनी पिवळी तर बारदाना मार्केट येथून व्यापाऱ्यांची १४५ वर्षे जुनी काळी मारबत विधिवत पूजा करून निघाली. या दोन्ही मारबतींचे मिलन इतवारी येथील नेहरू चौक ते मारवाडी चौकदरम्यान झाले. मिलनाचा हा क्षण तिथे उपस्थित हजारो नागरिकांनी अनुभवला. अनेकांनी तो क्षण मोबाइलमध्ये कैद करून घेतला.

छत्रपती शिवाजी पार्क बडग्या उत्सव समितीने अमेरिकेचे अध्यक्ष डोनाल्ड ट्रम्प यांचा बडग्या काढला. विदर्भ क्रांती दल बडग्या उत्सव मंडळाने भारतातील सीमावर्ती भागातील नागरिकांवर हल्ला करणाऱ्या पाकिस्तानच्या कारवाईचा विरोध दर्शविणारा बडग्या काढला. शिवशक्ती बाल मित्र बडग्या उत्सव मंडळाने भारत मित्रराष्ट्र असतानाही टेरिफ लावणाऱ्या अमेरिकेला गद्दार संबोधणारा बडग्या काढला. भाजप बडग्या उत्सव समितीने दहशतवादाविरुद्ध आवाज उठविला. टिमकी मोचिपुरा बडग्या उत्सव समितीने सोशल मीडियावर गाजत असलेल्या ‘दिल पे चलाई छुरिया’ या गाण्याच्या रीलवरील जोकरसदृश्य बडग्या काढून सर्वांचे लक्ष वेधले.

ॲक्शन कमिटी एनजीओद्वारे लव्ह जिहाद, बांगलादेशी घुसखोर, रोहिंगे, लँड जिहाद या मुद्यांना हात लावला. याशिवाय, मिरवणुकीत एकता मारबत उत्सव मंडळाची गुलाबी मारबत, लाल मारबत उत्सव मंडळाची लाल मारबत, सार्वजनिक पिवळी मारबत उत्सव मंडळाची छोटी पिवळी मारबत यांचादेखील समावेश होता. श्री विदर्भ अमरनाथ सेवा समितीने नागा साधूंचे नृत्य सादर केले. मिरवणूक संपल्यानंतर विधीवत पूजन करत मारबत बडग्यांचे दहन केले.