पर्यटन नव्हे, खेळाडू महत्त्वाचे

खेळाडूंच्या मदतीसाठीच अधिकारी जातील, पर्यटनासाठी नाही; क्रीडा प्रशासकीय परिषदेत मंत्र्यांचा सक्त इशारा

अहमदाबाद: आंतरराष्ट्रीय क्रीडा स्पर्धांमध्ये अधिकाऱ्यांनी पर्यटनाचा आनंद न घेता खेळाडूंच्या मदतीसाठीच जावे, असा सक्त इशारा केंद्रीय क्रीडा मंत्री मनसुख मांडविया यांनी दिला आहे. अहमदाबाद येथे आयोजित क्रीडा प्रशासकीय परिषदेत बोलताना त्यांनी स्पष्ट केले की, "आंतरराष्ट्रीय स्पर्धांसाठीचा दौरा हा कुटुंबासह पर्यटन नसते. तिथे खेळाडूंची काळजी घ्यायची असते." खेळाडूंच्या मदतीसाठीच जाण्याची तयारी असलेल्यांनीच आशियाई क्रीडा स्पर्धेसाठी नावे द्यावीत, असेही त्यांनी बजावले. या परिषदेत गुजरातचे उपमुख्यमंत्री आणि क्रीडा मंत्री हर्ष संघवी तसेच केंद्रीय क्रीडा सचिव हरि रंजन राव हे देखील उपस्थित होते.

यापूर्वी अनेकदा असे प्रकार घडले आहेत की, भारतीय संघासोबत अनेक अधिकारी जातात, पण खेळाडूंना गरज असताना एकही अधिकारी तिथे उपलब्ध नसतो. हे अत्यंत लाजिरवाणे आहे, असे केंद्रीय क्रीडा सचिव हरि रंजन राव यांनी म्हटले. ते पुढे म्हणाले, "तिथे जाणाऱ्या अधिकाऱ्यांनी सतत खेळाडूंचीच काळजी घ्यायला हवी. एखाद्या स्पर्धेसाठी जाणे म्हणजे कुटुंबीय, आप्तेष्टांसह पर्यटन नव्हे. ही अपेक्षा असणारे आम्हाला संघासोबत नकोत."

हरि रंजन राव यांनी क्रीडा महासंघांनाही धारेवर धरले. राष्ट्रकुल आणि आशियाई क्रीडा स्पर्धेसाठीचे पात्रता निकष जाहीर झाले आहेत. आशियाई क्रीडा संयोजन समितीने सदस्यांची नावे ३० जानेवारीपर्यंत देण्यास सांगितले आहे. क्रीडा महासंघाने खेळाडूंची यादी भारतीय ऑलिम्पिक संघटनेकडे १५ जानेवारीपर्यंत देणे बंधनकारक आहे. या यादीत संघासोबत जाणारे पदाधिकारीही हवेत. "तुम्ही सर्व यासाठी तयार आहात? आम्हाला नावे दिली नाहीत, तर स्पर्धेसाठी जाता येणार नाही. एकदा नाव दिल्यावर त्यात बदलही करता येणार नाही. जपानी लोक कोणतीही दयामाया दाखवत नाहीत. ते कोणत्याही तडजोडीस तयार नसतात," असे राव यांनी बजावले.

आशियाई, राष्ट्रकुल यांसारख्या बहुविध क्रीडा स्पर्धांसाठी जाणाऱ्या पथकांत अधिकाऱ्यांचा समावेश जास्त असतो. मात्र, खेळाडूंसमोरील अडचणी सोडवण्यासाठी हे अधिकारी उपलब्ध नसतात, अशी टीका अनेकदा होत असते. आशियाई क्रीडा स्पर्धा १९ सप्टेंबर ते ४ ऑक्टोबर दरम्यान एइची-नागोया (जपान) येथे होणार आहे, तर राष्ट्रकुल क्रीडा स्पर्धा जुलै-ऑगस्टमध्ये आहे. या स्पर्धांमध्ये अधिकाऱ्यांनी आपली भूमिका गांभीर्याने पार पाडावी, अशी अपेक्षा व्यक्त करण्यात आली आहे.