‘बांगलादेश’ची आर्थिक कोंडी?

भारत आणि बांगलादेश यांच्यातील वाढत्या तणावामुळे बांगलादेशी क्रिकेटपटूंना मोठा धक्का बसला आहे. आयपीएलमधून मुस्तफिझूर रहमानला वगळण्याच्या बीसीसीआयच्या निर्णयानंतर, बांगलादेशने टी-२० वर्ल्ड कपमधील भारतातील सामने न खेळण्याची भूमिका घेतली. या पार्श्वभूमीवर, आता भारतीय कंपन्यांनी बांगलादेशच्या खेळाडूंसोबतचे वैयक्तिक करार रद्द करण्यास सुरुवात केली आहे. एसजी कंपनीने लिट्टन दास, मोमिनुल हक आणि यासीर रब्बी यांच्यासोबतचे बॅटवरील जाहिरातीचे करार रद्द केले आहेत. यामुळे बांगलादेशी खेळाडूंच्या उत्पन्नावर परिणाम होण्याची भीती आहे.

भारतातील क्रीडा साहित्य बनवणारी एसजी कंपनीने बांगलादेशच्या खेळाडूंसोबतचे करार रद्द केल्याचे वृत्त आहे. कंपनीने अधिकृतपणे काहीही सांगितले नसले तरी, नवीन करार न करण्याचा निर्णय घेतल्याचे एजंट्सनी खेळाडूंना सूचित केले आहे. ज्या खेळाडूंचे करार अजून काही वर्षांसाठी आहेत, त्यांच्या करारांचाही फेरविचार केला जात आहे. यामुळे बांगलादेशी खेळाडू चिंतेत आहेत, कारण त्यांचे अनेक करार भारतीय कंपन्यांशी आहेत.

एसजी कंपनीने हा करार रद्द केल्याचे वृत्त टेलिकॉम एशिया स्पोर्ट या संकेतस्थळाने दिले आहे. बॅटवरील जाहिरात हा व्यावसायिक क्रिकेटपटूंच्या उत्पन्नाचा एक महत्त्वाचा भाग असतो. त्यामुळे या करारांमुळे खेळाडूंचे मोठे आर्थिक नुकसान होऊ शकते.

मुश्फिकर, साब्बीर रहमान आणि नासीर होसेन यांचा करार सरीन स्पोर्टस इंडस्ट्रीज (एसएस) सोबत आहे. हा करारही संकटात येण्याची शक्यता आहे. एका कंपनीने करार रद्द करण्याची सुरुवात केली आहे, त्यामुळे इतर कंपन्याही असाच निर्णय घेऊ शकतात, अशी भीती बांगलादेशी खेळाडूंना वाटत आहे. हा क्रिकेट संघर्ष आता खेळाडूंच्या वैयक्तिक आर्थिक भविष्यावरही परिणाम करत आहे.