जळगावात गुरुवारी (दि. १५) महापालिका निवडणुकीसाठी मतदान होत असताना दुपारी पिंप्राळा परिसरात हवेत गोळीबार केल्याची घटना घडल्याने खळबळ उडाली. सुदैवाने यात कोणालाही दुखापत झालेली नाही. मिस्त्री कामाच्या पैशाच्या वैयक्तिक वादातून हा प्रकार झाल्याचे समोर येत आहे. घटनास्थळी पोलिस अधीक्षक डॉ. महेश्वर रेड्डी यांनी भेट दिली असून, या प्रकाराचा निवडणुकीशी संबध नसल्याचे स्पष्टीकरण त्यांनी दिले आहे.
या घटनेतील संशयित तुषार सोनवणे याचे मिस्त्री कामाचे अंदाजे एक लाख ७० हजार रुपये मुस्तफा याच्याकडे थकलेले होते. वारंवार मागणी करूनही मुस्तफा पैसे देण्यास टाळाटाळ करत होता. गुरुवारी मतदानाच्या दिवशी आनंद मंगल सोसायटी येथील हनुमान मंदिराजवळ मुस्तफा आणि तुषार सोनवणे हे समोरासमोर आले. यावेळी पैसे देवाणघेवाणीचा वाद पुन्हा उफाळला. संतापलेल्या तुषार सोनवणे याने गुरुवारी मुस्तफावर गोळीबार केला. घटनास्थळी पोलिसांना बंदुकीची रिकामी पुंगळी सापडली आहे.
घटनेची माहिती मिळताच पोलिस अधीक्षक डॉ. महेश्वर रेड्डी, अपर अधीक्षक अशोक नखाते, डीवायएसपी नितीन गणापुरे, स्थानिक गुन्हे शाखेचे निरीक्षक राहुल गायकवाड व रामानंदनगर पोलिस ठाण्याचे निरीक्षक राजेंद्र गुंजाळ यांनी तातडीने घटनास्थळी धाव घेतली. फिर्यादी मुस्तफा याने रामानंदनगर पोलिस स्टेशन गाठले. गुन्हा दाखल करण्याची प्रक्रिया सुरू होती.
