भाजपच्या इशाऱ्यावरून बदल्या

पश्चिम बंगालच्या मुख्यमंत्री ममता बॅनर्जी यांनी निवडणूक आयोग ावर भाजपच्या इशाऱ्यावर काम करत असल्याचा गंभीर आरोप केला आहे. विधानसभा निवडणुकांच्या पार्श्वभूमीवर वरिष्ठ प्रशासकीय आणि पोलिस अधिकाऱ्यांच्या बदल्यांवरून त्यांनी हे वक्तव्य केले. राज्यात कोणतीही अनुचित घटना घडल्यास निवडणूक आयोग आणि भाजपला जबाबदार धरण्याचा इशाराही त्यांनी दिला. तृणमूल काँग्रेसच्या उमेदवारांची यादी जाहीर करताना त्यांनी पत्रकारांशी बोलताना हे आरोप केले.

ममता बॅनर्जी यांनी प्रश्न विचारला की, "ईदच्या आधी वरिष्ठ अधिकाऱ्यांची बदली का केली जात आहे? निवडणुकांआधी दंगली भडकावण्याचा त्यांचा डाव आहे का?" त्यांनी पुढे म्हटले की, "बदल्यांची यादी भाजपच्या कार्यालयात तयार झाली आहे. निवडणूक आयोगाने त्याची केवळ अंमलबजावणी केली." त्यांनी असाही आरोप केला की, निवडणूक प्रक्रियेत भाजपला मदत करण्यासाठी पश्चिम बंगालच्या बाहेरून काही अधिकाऱ्यांना आणण्यात आले आहे. "त्यांनी सरळ भाजपसाठी प्रचार करायला हवा. निवडणूक आयोग राजकीय दबावात काम करत आहे," असे त्या म्हणाल्या.

"निवडणुकीपूर्वी भाजपसाठी पैसे आणि शस्त्रास्त्रांची वाहतूक सुलभ करण्याच्या उद्देशाने या बदल्या करण्यात आल्या आहेत," असा आरोपही त्यांनी केला. रविवारी निवडणुकीचे वेळापत्रक जाहीर झाल्यानंतर, निवडणूक आयोगाने मुख्य सचिव नंदिनी चक्रवर्ती आणि गृह सचिव जगदीश प्रसाद मीणा यांच्या बदल्या केल्या. त्यानंतर, आयोगाने पोलिस महासंचालक पीयूष पांडे आणि कोलकाताचे मुख्य सचिव सुप्रतिम सरकार यांनाही हटवले.

निवडणूक आयोगाने पश्चिम बंगालमधील विधानसभा निवडणुकीच्या आधी आणखी एकदा फेरबदल करत येथील १९ वरिष्ठ पोलिस अधिकाऱ्यांच्या बदल्या करण्याचे आदेश प्रसृत केले. यामध्ये दोन अतिरिक्त पोलिस महासंचालकांचा (एडीजी) समावेश आहे. भारतीय पोलिस सेवेचे अधिकारी राजेश कुमार सिंह यांची दक्षिण बंगालचे नवीन एडीजी म्हणून, तर के. जयरामन यांची उत्तर बंगालचे एडीजी म्हणून नियुक्ती करण्यात आली आहे. या बदल्यांमुळे राजकीय वर्तुळात चर्चांना उधाण आले आहे. ममता बॅनर्जी यांनी निवडणूक आयोगाच्या निष्पक्षतेवर प्रश्नचिन्ह उपस्थित केले आहे.