‘क्रिप्टो’त नफ्याचे आमिष; दीड कोटी रुपयांनी गंडा, सायबर पोलिसांत गुन्हा दाखल

महाराष्ट्र टाइम्स•

Nagpur Crypto Fraud: नागपूरमध्ये कृष्णा डबरासे नावाच्या एका व्यक्तीला क्रिप्टो करन्सीमध्ये गुंतवणुकीच्या नावाखाली सायबर गुन्हेगारांनी तब्बल १ कोटी ४० लाख ५० हजार रुपयांचा गंडा घातला. समाज माध्यमावरील एका जाहिरातीला बळी पडून त्यांनी ही रक्कम गुंतवली, सुरुवातीला काही पैसे परत मिळाल्याने त्यांचा विश्वास बसला

Crypto Fraud in Nagpur
म.टा.प्रतिनिधी, नागपूर : क्रिप्टो करन्सीत गुंतवणूक केल्यास मोठा नफा मिळवून देण्याचे आमिष दाखवून सायबर गुन्हेगारांनी इसमाला १ कोटी ४० लाख ५० हजार रुपयांनी गंडा घातला. याप्रकरणी सायबर पोलिसांनी ठकबाजाविरुद्ध माहिती तंत्रज्ञान कायदा, फसवणुकीसह विविध कलमान्वये गुन्हा दाखल केला.

पोलिसांकडून प्राप्त माहितीनुसार, कृष्णा भीमरावजी डबरासे (वय ५५, रा. धम्मकीर्तीनगर, दत्तवाडी) हे खासगी नोकरी करतात. ते समाजमाध्यमांचाही वापर करतात. २५ जुलैला त्यांना समाजमाध्यमावर क्रिप्टो करन्सीत गुंतवणूक केल्यास अधिक नफा मिळेल, अशी जाहिरात दिसली. त्यांनी जाहिरातीत दिलेली लिंक उघडली. आपली संपूर्ण माहिती भरून नोंदणी केली. त्यानंतर लगेच त्यांच्या मोबाइलवर एका महिलेने संपर्क साधला. तिने त्यांना क्रिप्टोबाबत माहिती दिली. डबरासे यांनी दोनवेळा एक लाख रुपये गुंतविले. त्यानंतर त्यांना नफा मिळाल्याचे त्या लिंकवर दिसले. त्यांनी ही रक्कम काढण्याचा फॉर्म भरला. सायबर गुन्हेगाराने साडेचार लाख रुपये परत पाठवून डबरासे यांचा विश्वास संपादन केला.
त्यानंतर डबरासे यांनी वेळोवेळी १ कोटी ४० लाख ५० हजार रुपये गुंतविले. त्यावर त्यांना मोठा नफा मिळाल्याचे आढळले. त्यांनी ती रक्कम काढण्यासाठी लिंकवर अर्ज दिला. ‘तुम्हाला प्राप्तिकर भरावा लागेल’, असे सायबर ठकबाजाने त्यांना सांगितले. रक्कम खात्यात जमा झाली नसताना प्राप्तिकर भरावा लागल्याचे ठकबाजाने सांगितल्याने त्यांना संशय आला. त्यांनी रक्कम जमा करण्यास सांगितले. ठकबाजाने रक्कम जमा केली नाही. फसवणूक झाल्याने डबरासे यांनी सायबर पोलिस ठाण्यात तक्रार दिली. पोलिसांनी गुन्हा दाखल केला. सायबर पोलिस ठाण्याचे पोलिस निरीक्षक बळीराम सुतार यांनी तांत्रिक तपास करून ठकबाजाच्या खात्यातील १७ लाख रुपये गोठविले. बँक खात्याच्या आधारे पोलिस ठकबाजांचा शोध घेत आहेत.

हेही वाचा