Pune Crime: रस्त्यातील किरकोळ वादातून मारहाण; कारचालकाचे नाक फ्रॅकचर, चोघांना अटक| Maharashtra Times

म.टा. प्रतिनिधी ,पुणे : शहरात रस्त्यावर होणाऱ्या किरकोळ वादातून वाहनचालकांमध्ये हाणामारीच्या घटना वाढीस लागल्या आहेत. खडकी परिसरात कारचालकाला अडवून दुचाकीस्वार व त्याच्या साथीदारांनी बेदम मारहाण केल्याची घटना घडली. या मारहाणीमध्ये चालकाचे नाक फ्रॅक्चर झाले असून, खांदा निखळला आहे. खडकी पोलिसांनी या प्रकरणी चौघांना अटक केली आहे.

खडकी पोलिस ठाण्यात सत्यम सुखसागर भार्गव (वय २९, रा. खराडी) यांनी तक्रार दिली आहे. पोलिसांनी दिलेल्या माहितीनुसार, २५ ऑगस्टला सायंकाळी पावणेसहाच्या सुमारास भार्गव हे खडकीतील गुरुद्वारा रस्त्याने मोटार घेऊन जात होते. त्या वेळी वेगवेगळ्या दोन दुचाकींवरून आलेल्या चौघांनी किरकोळ वादातून त्यांची मोटार अडवली.

भार्गव यांनी ‘वेडीवाकडी दुचाकी चालवू नका’ असा सल्ला दिल्याने आरोपी संतापले. त्यानंतर त्यांनी भार्गव यांना शिवीगाळ करून बेदम मारहाण केली. हातातील कड्याने मारल्याने त्यांच्या नाकाला फ्रॅक्चर झाले; तसेच खांदा निखळला. मारहाणीदरम्यान रक्तस्त्राव सुरू झाला. त्यांच्यासोबत असलेल्या मित्राने मध्यस्थी करण्याचा प्रयत्न केला असता त्यालाही शिवीगाळ करून मारहाण करण्यात आली. यानंतर आरोपी घटनास्थळावरून पसार झाले. मात्र, भार्गव यांनी पोलिसांकडे धाव घेऊन तक्रार दिली. खडकी पोलिसांनी तत्काळ कारवाई करून चौघा आरोपींना अटक केली. या प्रकरणाचा तपास उपनिरीक्षक दिग्विजय चौगले करीत आहेत.

मारहाण होताना पोलिसांना कॉल

आरोपींनी दुचाकी रस्त्यात आडवी घालून भार्गव यांना थांबवले आणि शिवीगाळ सुरू केली. त्या वेळी भार्गव यांनी धोका लक्षात घेऊन पोलिस नियंत्रण कक्षाला कॉल केला. हा सर्व प्रकार घडत असताना दुसरीकडे त्यांनी मोबाइलमध्ये चित्रीकरणही केले. तो व्हिडिओ समाजमाध्यमात मोठ्या प्रमाणावर व्हायरल झाला असून, आरोपींचे चेहरे त्यात स्पष्ट दिसून येत आहेत.