कोपरी परिसरात ट्रान्सफॉर्मरमध्ये बिघाड झाल्यामुळे रविवारी मध्यरात्रीपासून पहाटेपर्यंत विद्युतपुरवठा खंडित झाला. रात्री सुमारे १ वाजल्यापासून पहाटे ६ वाजेपर्यंत अनेक भागांमध्ये वीज नसल्याने नागरिकांना मोठ्या त्रासाला सामोरे जावे लागले. एप्रिलच्या उकाड्यामुळे आधीच त्रस्त असलेल्या नागरिकांना वीज नसल्याने रात्र जागून काढावी लागली.
लहान मुले, ज्येष्ठ नागरिक आणि रुग्णांचे उष्णतेमुळे हाल झाले. अनेक रहिवाशांनी सोशल मीडियावरून नाराजी व्यक्त करत तत्काळ वीजपुरवठा सुरळीत करण्याची मागणी केली. काही भागांमध्ये तांत्रिक पथकाने जलद हालचाली करत दुरुस्तीचे काम हाती घेतल्याने १ ते २ तासांत वीजपुरवठा पूर्ववत करण्यात आला. मात्र, काही ठिकाणी दुरुस्तीला अधिक वेळ लागल्याने नागरिकांना पहाटेपर्यंत प्रतीक्षा करावी लागली.
