बारामुल्लामध्ये आढळला जिवंत बॉम्ब

जम्मू-काश्मीरमधील बारामुल्ला जिल्ह्यात लष्करी केंद्राजवळ जिवंत बॉम्ब सापडल्याने खळबळ उडाली. बॉम्ब शोधक पथकाने तातडीने कारवाई करून तो निकामी केला, त्यामुळे मोठा अनर्थ टळला. दरम्यान, मणिपूरचे माजी मुख्यमंत्री एन. बीरेन सिंह आणि भाजप प्रदेशाध्यक्ष ए. शारदा देवी पक्षाध्यक्षपदाच्या निवडणुकीसाठी दिल्लीला रवाना झाले. हैदराबादमध्ये मंदिरातील मूर्तीची विटंबना करणाऱ्या संशयिताला अटक करण्यात आली, तर दिल्लीत वाढत्या प्रदूषणामुळे 'ग्रॅप३'चे निर्बंध लागू करण्यात आले आहेत. केंद्रीय दक्षता आयोगाच्या दक्षता आयुक्तपदी प्रवीण वशिष्ठ यांची नियुक्ती झाली असून, सरकारने सट्टेबाजी आणि जुगाराशी संबंधित २४२ वेबसाइट्स ब्लॉक केल्या आहेत.

बारामुल्ला जिल्ह्यात शुक्रवारी एका लष्करी केंद्राजवळ जिवंत उखळी बॉम्ब आढळल्याने परिसरात भीतीचे वातावरण पसरले होते. उत्तर काश्मीरमधील रामपूर भागात एका लष्करी तळाजवळ खोदकाम सुरू असताना हा बॉम्ब सापडला. माहिती मिळताच, लष्कराच्या बॉम्ब शोधक व नाशक पथकाने तातडीने घटनास्थळी धाव घेतली. त्यांनी परिसराची नाकाबंदी करून तो भाग सुरक्षित केला. स्थानिक पोलिसांनाही या घटनेची माहिती देण्यात आली. त्यानंतर, पोलिसांच्या उपस्थितीत बॉम्ब शोधक पथकाने बॉम्बची सुरक्षित विल्हेवाट लावली. प्रशासनाने स्पष्ट केले की, वेळीच ही कारवाई झाल्यामुळे कोणतीही जीवितहानी झाली नाही आणि मोठा धोका टळला.

मणिपूरचे माजी मुख्यमंत्री आणि भाजप विधिमंडळ पक्षाचे नेते एन. बीरेन सिंह, तसेच भाजपच्या प्रदेशाध्यक्ष ए. शारदा देवी यांनी शुक्रवारी तातडीने नवी दिल्लीकडे प्रस्थान केले. इंफाळ विमानतळावर पत्रकारांशी बोलताना एन. बीरेन सिंह यांनी सांगितले की, हा दौरा आगामी निवडणुकांशी संबंधित आहे. भाजपच्या एका वरिष्ठ पदाधिकाऱ्याने दिलेल्या माहितीनुसार, पक्षाच्या राष्ट्रीय अध्यक्षपदाच्या निवडणुकीसाठी उमेदवारी अर्ज भरण्याच्या प्रक्रियेत सहभागी होण्यासाठी हे नेते दिल्लीला गेले आहेत. मणिपूरमध्ये सुरू असलेल्या वांशिक हिंसाचाराच्या पार्श्वभूमीवर, गेल्या वर्षी फेब्रुवारी महिन्यात एन. बीरेन सिंह यांनी मुख्यमंत्रिपदाचा राजीनामा दिला होता. त्यानंतर १३ फेब्रुवारी २०२५ पासून मणिपूरमध्ये राष्ट्रपती राजवट लागू करण्यात आली आहे.

हैदराबादमध्ये एका मंदिराच्या व्हरांड्यातील मूर्तीची विटंबना केल्याप्रकरणी पोलिसांनी एका संशयिताला अटक केली आहे. या घटनेनंतर शहरात निर्माण झालेला तणाव आता नियंत्रणात असून परिस्थिती शांततापूर्ण आहे. कामाटीपुरा पोलिस ठाण्यात गुरुवारी दोन गुन्हे दाखल करण्यात आले. पुराणापूल परिसरात बुधवारी रात्री उशिरा झालेल्या या घटनेमुळे तणाव निर्माण झाला होता.

राजधानी दिल्लीत हवेचा गुणवत्ता निर्देशांक (एक्यूआय) वाढत असून तो ४०० च्या पलीकडे, म्हणजेच ‘गंभीर’ श्रेणीत जाण्याची शक्यता आहे. त्यामुळे, हवा गुणवत्ता व्यवस्थापन आयोगाने (सीएक्यूएम) राष्ट्रीय राजधानी परिसरात ‘ग्रॅप३’चे निर्बंध लागू केले आहेत. दिल्लीचा ‘एक्यूआय’ गुरुवारच्या ३४३ वरून शुक्रवारी ३५४ झाला आहे. ‘ग्रॅप’ म्हणजे ‘ग्रेडेड रिस्पॉन्स ॲक्शन प्लॅन’, जो हवेची गुणवत्ता खालावल्यावर लागू केला जातो. ‘ग्रॅप३’ म्हणजे हवेच्या गुणवत्तेची तिसरी गंभीर पातळी.

केंद्रीय दक्षता आयोगाच्या दक्षता आयुक्तपदी निवृत्त आयपीएस अधिकारी प्रवीण वशिष्ठ यांची नियुक्ती शुक्रवारी करण्यात आली. १९९१च्या आयपीएस तुकडीतील अधिकारी असलेले वशिष्ठ हे बिहार केडरचे अधिकारी आहेत. याआधी ते केंद्रीय गृह मंत्रालयात विशेष सचिव (अंतर्गत सुरक्षा) पदावर नियुक्त होते.

सरकारने सट्टेबाजी आणि जुगार यांच्याशी संबंधित २४२ वेबसाइट्सच्या लिंक्स ब्लॉक केल्या आहेत. याआधी ऑगस्टमध्ये पैसे लावून खेळण्याच्या गेमिंग ॲप्सवर बंदी घालण्यात आली होती. ऑनलाइन गेमिंग कायद्याला मंजुरी मिळाल्यानंतर, आतापर्यंत सात हजार ८०० वेबसाइट्स ब्लॉक करण्यात आल्या आहेत. गेल्या काही काळात सरकारकडून अशा साइट्सवर सातत्याने कारवाई केली जात आहे.