लाल रंगाच्या केसांवरून तिखट टीका

ओडिशामध्ये एका पोलिस उपअधीक्षकाने केसांना लाल रंग लावल्याने संपूर्ण पोलिस दलाच्या प्रतिमेवर प्रश्नचिन्ह निर्माण झाले आहे. जगतसिंगपूर जिल्ह्यातील रश्मीरंजन दास या अधिकाऱ्याच्या या कृतीमुळे सोशल मीडियावर जोरदार टीका होत आहे. या प्रकरणानंतर पोलिस महानिरीक्षकांनी संबंधित अधिकाऱ्याला समज देण्याचे आदेश दिले आहेत. मात्र, पोलिसांच्या केशरचनेबाबत कोणतेही लेखी नियम नसल्याने यावर अधिकृत कारवाई करणे कठीण असल्याचेही समोर आले आहे.

पोलिसांबद्दल सामान्य नागरिकांच्या मनात नेहमीच आदर असतो. कर्तव्यदक्ष, २४ तास सेवेत तत्पर आणि संकटात मदतीला धावणारे अशी पोलिसांची प्रतिमा आहे. या प्रतिमेत पोलिसांच्या गणवेशाला विशेष महत्त्व आहे. मात्र, ओडिशामध्ये घडलेल्या या घटनेमुळे पोलिसांच्या प्रतिमेला धक्का बसला आहे. जगतसिंगपूरचे पोलिस उपअधीक्षक रश्मीरंजन दास यांनी आपल्या केसांना लाल रंग लावला होता. त्यांचे हे छायाचित्र सोशल मीडियावर व्हायरल झाल्यानंतर त्यांच्यावर सर्व बाजूंनी टीका होऊ लागली. अनेक नेटिझन्सनी म्हटले की, महत्त्वाच्या पदावर असलेल्या अधिकाऱ्याने असे करणे पोलिस दलाची प्रतिमा मलिन करणारे आहे आणि खाकी वर्दीच्या रुबाबाला यामुळे धक्का लागला आहे.

या टीकेची गंभीर दखल घेत पोलिस महानिरीक्षक सत्यजित नाईक यांनी जगतसिंगपूरच्या पोलिस अधीक्षकांना संबंधित अधिकाऱ्याला समज देण्याचे आदेश दिले आहेत. मात्र, पोलिसांची केशरचना कशी असावी, याबाबत कोणतेही लेखी सूचना किंवा परिपत्रक जारी केलेले नाही, असेही नाईक यांनी स्पष्ट केले.

या विषयावर पोलिस दलातच मतमतांतरे आहेत. एका वरिष्ठ अधिकाऱ्याने निदर्शनास आणून दिले की, ओडिशामध्येच नव्हे तर देशभरातील अनेक महिला पोलिस अधिकारी त्यांचे केस वेगवेगळ्या रंगात रंगवतात. मात्र, पुरुष असो वा महिला अधिकारी, सर्वांनी आपले केस नैसर्गिक रंगात ठेवणे गरजेचे आहे. वयोमानानुसार केस पांढरे झाल्यास काय करायचे, यावरही प्रश्नचिन्ह आहे. केसांचा रंग कोणता असावा, याबाबत पोलिस दलात कोणतेही लिखित नियम नाहीत. त्यामुळे यासंदर्भात कोणतेही आदेश जारी करणे शक्य नाही, असेही या अधिकाऱ्याने सांगितले.

दुसरीकडे, एका महिला अधिकाऱ्याने यावर तीव्र नाराजी व्यक्त केली. त्यांनी म्हटले की, कोणताही कायदा किंवा नियम पोलिस अधिकाऱ्यांच्या केसांचा रंग कसा असावा, हे सांगत नाहीत. आम्ही आमच्या जबाबदाऱ्या इमानेइतबारे पार पाडतो. आमच्या कामावर टीका झाली तर आम्ही समजू शकतो, पण आमच्या वैयक्तिक पेहरावावर किंवा केशरचनेवर टीका करण्याचा अधिकार कोणालाही नाही, असे त्यांनी ठामपणे सांगितले.