पंजाब आणि हरियाणा या दोन राज्यांची राजधानी असलेल्या चंडीगड महापालिकेत बहुमत नसतानाही महापौर निवडणुकीत भाजपने विजय मिळवला. या विजयामागे चंडीगडचे प्रभारी आणि भाजपचे राष्ट्रीय महासचिव विनोद तावडे यांचा करिष्मा असल्याचे काँग्रेसच्या गोटात बोलले जात आहे. तावडे यांच्या नेतृत्वाखाली चंडीगडच्या महापौरपदी सलग चौथ्यांदा भाजपची सरशी झाली.
महापौरपदाच्या निवडणुकीत गुरुवारी भाजपचे सौरभ जोशी (४६) निवडून आले तर ३३ वर्षीय जसमनप्रीत सिंह वरिष्ठ उपमहापौर तर आम आदमी पक्षातून (आप) आलेल्या ३४ वर्षीय सुमन देवी या उपमहापौर म्हणून निवडून आल्या. सौरभ जोशी हे चंडीगडचे सर्वात तरुण महापौर ठरले आहेत. ३५ नगरसेवकांच्या चंडीगड महापालिकेत सुरुवातीला १२ जागा मिळविणाऱ्या भाजपचे संख्याबळ नंतर १८ पर्यंत वाढले. या काळात तावडे हेच या शहराचे पक्षप्रभारी होते. महापौरपदाची निवडणूक जिंकण्यासाठी १९ मते आवश्यक असताना ‘क्रॉस वोटिंग’ची वेळही येऊ न देता तावडे यांच्या नेतृत्वाखाली महापौरपदी भाजपचा उमेदवार निवडून आला. काँग्रेसचा एक आणि आम आदमी पक्षाचे दोन अशा तीन नगरसेवकांनी उघडपणे भाजपच्या बाजूने मतदान केले. हे तिघेही भाजपच्या बाजूने मतदान करणार याची माहिती तावडे यांनी पहाटे तीन वाजता दिल्लीत दिली.
काँग्रेसमध्ये अस्वस्थता
भाजपने अवघ्या दहा दिवसांपूर्वी तावडे यांना चंडीगडच्या महापौरपदाच्या निवडणुकीचे प्रभारी म्हणून नियुक्त केले. त्यानंतर परिस्थिती बदलत केली. तावडेंच्या नियुक्तीनंतर लगेचच राजधानीतील इंदिरा भवनात काँग्रेसच्या गोटात अस्वस्थता पसरली. खासदार मनीष तिवारी यांनी अरविंद केजरीवाल यांच्याबरोबर जाण्याचा मनोदय व्यक्त केला होता. परंतु, तावडे यांच्या नियुक्तीनंतर आपबरोबर युती नको, असा सूर पंजाबातील वरिष्ठ काँग्रेस नेत्यांनी लावला. काँग्रेसने लाजिरवाणी जोखीम पत्करण्याऐवजी पराभव स्वीकारण्याचा निर्णय घेऊन ‘आप’शी युती करण्याचा केजरीवाल यांचा आग्रह धुडकावला.
