सार्वजनिक आरोग्य विभागाच्या आरोग्य उपकेंद्रांमध्ये कार्यरत असलेल्या अंशकालीन स्त्री परिचरांचे मासिक मानधन तीन हजार रुपयांवरून सहा हजार रुपये करण्याचा निर्णय घेण्यात आला आहे. १ एप्रिल २०२६पासून ही वाढ लागू होणार आहे.
आरोग्य उपकेंद्रातील अंशकालीन स्त्री परिचर या गाव पातळीवर, आदिवासी, दुर्गम, डोंगराळ भागात प्राथमिक आरोग्यसेवा तळागाळापर्यंत नेण्यासाठी मदत करतात. आरोग्य विभागाकडून राबविण्यात येणाऱ्या विविध आरोग्यविषयक कार्यक्रमांचा लाभ प्रत्येक कुटुंबापर्यंत नेण्यात त्या महत्त्वाची भूमिका बजावतात. त्यांच्या कामाचे स्वरूप पाहता त्यांच्या मानधनात वाढ करण्याची मागणी लोकप्रतिनिधी तसेच संघटनांकडूनही होत होती.
