एकमेकींना आधार देऊन महिलांनी पुढे जायला हवे
महाराष्ट्र टाइम्स•
पुण्यात महिला उद्योजिका पुरस्कार वितरण सोहळा पार पडला. खासदार प्रा. डॉ. मेधा कुलकर्णी यांनी महिलांनी एकमेकींना आधार देत पुढे जावे असे आवाहन केले. जी. आर. इंजिनीअरिंगच्या गौरी जोशी आणि निरामय वेलनेसच्या डॉ. अमृता चांदोरकर यांना पुरस्कार प्रदान करण्यात आले. व्यावसायिक कार्यामध्ये शिष्टाचार या विषयावरही मार्गदर्शन करण्यात आले.
खासदार कुलकर्णी यांनी सांगितले की, भारतात उद्योग क्षेत्रात वीस टक्के महिला कार्यरत आहेत आणि जीडीपीमध्ये त्यांचे योगदान १७ टक्के आहे. अनेक अडचणींवर मात करून महिला उद्योग क्षेत्रात आपले स्थान निर्माण करतात. त्यामुळे महिलांनी एकमेकींना आधार देत पुढे जायला हवे. ‘स्वतःमधील संवेदनशीलतेला आपली ताकद बनवावी,’ असा सल्ला त्यांनी दिला. मराठा चेंबर ऑफ कॉमर्सच्या सुमंत मुळगावकर सभागृहात झालेल्या या कार्यक्रमाला संस्थेचे कार्याध्यक्ष विश्राम कुलकर्णी आणि दिलीप कुंभोजकर उपस्थित होते.जी. आर. इंजिनीअरिंगच्या गौरी जोशी यांना सावित्रीबाई नारायण जोशी स्मरणार्थ स्वयंसिद्धा पुरस्कार प्रदान करण्यात आला. तर, ‘निरामय वेलनेस’च्या डॉ. अमृता चांदोरकर यांना मनोरमा श्यामराव कुंभोजकर स्मरणार्थ युवा उद्योजिका पुरस्काराने गौरवण्यात आले. संस्थेच्या माणिक सुपेकर, प्रतिभा संगमनेरकर, डॉ. स्वाती कुलकर्णी, श्रीकांत जोशी, उपेंद्र केळकर आणि मंजूषा वैद्य यांनी कार्यक्रमाचे आयोजन केले होते.
कार्यक्रमात विश्राम कुलकर्णी यांनी संस्थेच्या कार्याची माहिती दिली. त्यानंतर ‘व्यावसायिक कार्यामध्ये शिष्टाचार’ या विषयावर डॉ. जयश्री फडणवीस यांनी मार्गदर्शन केले. माणिक सुपेकर यांनी सूत्रसंचालन केले, तर प्रतिभा संगमनेरकर यांनी आभार मानले.
