अडीच लाख भारतीय प्रवाशांची घरवापसी
महाराष्ट्र टाइम्स•
पश्चिम आशियात युद्ध सुरू झाल्यापासून १९ दिवसांत २ लाख ६० हजार भारतीय मायदेशी परतले आहेत. केंद्र सरकारने विशेष मोहीम आखली असून ७० विशेष विमानांनी ही घरवापसी झाली आहे. परराष्ट्र मंत्रालयाने ही माहिती दिली. पंतप्रधान मोदी आणि संयुक्त अरब अमिरातीच्या अध्यक्षांमध्ये पश्चिम आशियातील परिस्थितीवर चर्चा झाली. भारताने हल्ल्यांचा निषेध केला.
आंतरमंत्रालयीन गटाचे अतिरिक्त सचिव असीम महाजन यांनी ही माहिती दिली. ते म्हणाले की, "२८ फेब्रुवारीपासून युद्ध सुरू झाले. तेव्हापासून आम्ही तेथील प्रवासी आणि निवासी भारतीयांशी संपर्कात आहोत आणि अनेकांना मायदेशी आणण्यात आले." या विशेष मोहिमेद्वारे आतापर्यंत २ लाख ६० हजार भारतीयांनी सुरक्षितपणे भारतात पाऊल ठेवले आहे.परराष्ट्र मंत्रालयाचे प्रवक्ते रणधीर जयस्वाल यांनी पंतप्रधान नरेंद्र मोदी आणि संयुक्त अरब अमिरातीचे अध्यक्ष शेख मोहम्मद बिन झायेद अल नहयान यांच्यातील दूरध्वनी संभाषणाबद्दलही माहिती दिली. या संभाषणात दोन्ही नेत्यांनी पश्चिम आशियातील सद्यस्थितीवर चर्चा केली. भारताने संयुक्त अरब अमिरातीवर झालेल्या सर्व हल्ल्यांचा निषेध नोंदवला. तसेच, होर्मुझच्या सामुद्रधुनीतून जहाजांना सुरक्षित मार्ग मिळावा, यावरही दोन्ही नेत्यांमध्ये सहमती झाली. या मोहिमेमुळे पश्चिम आशियातील तणावपूर्ण परिस्थितीत अडकलेल्या भारतीयांना मोठा दिलासा मिळाला आहे.
