ओझर - शिर्डी मार्गाला प्रतीक्षाच!
Contributed by: सिन्नर,म. टा. वृत्तसेवा|महाराष्ट्र टाइम्स.कॉम•
ओझर विमानतळ ते शिर्डी विमानतळ हा सुमारे २१० कोटी रुपये खर्चाचा आणि १० मीटर रुंदीचा प्रस्तावित मार्ग निफाडचे आमदार दिलीप बनकर, सिन्नरचे आमदार माणिकराव कोकाटे आणि कोपरगावचे आमदार आशुतोष काळे यांच्या मतदारसंघांतून जाणार आहे. तीन मतदारसंघांतील दळणवळण, औद्योगिक विकास आणि ग्रामीण वाहतुकीसाठी हा मार्ग महत्त्वाचा ठरणार आहे. सिंहस्थ कुंभमेळ्यात शिर्डी तसेच मराठवाडा आणि विदर्भातून नाशिककडे येणाऱ्या भाविकांसाठीही हा पर्यायी मार्ग उपयुक्त ठरू शकतो. मात्र, या महत्त्वाकांक्षी प्रकल्पाला अद्याप प्रशासकीय मंजुरी मिळालेली नाही.दुसरीकडे अहिल्यानगर जिल्ह्यातील रामा-६६ ते शनी शिंगणापूर ते कांगोनी, सोनई - घोडेगाव - कुकाणा, सोनई - कांगोनी ते अहिल्यानगर - छत्रपती संभाजीनगर आणि कांगोनी - खरवंडी तसेच खरवंडी - वडाळा बहिरोबा या रस्त्यांसाठी एकूण ५८.६० कोटी रुपयांच्या स्वतंत्र प्रशासकीय मान्यता देण्यात आल्या आहेत. तसेच चांदवड - लासलगाव रस्त्याच्या रुंदीकरण व सुधारणेसाठी ७५.८२ कोटी रुपयांना मंजुरी देण्यात आली आहे. चांदवड मतदारसंघात भाजपचे आमदार राहुल आहेर आहेत. विशेष म्हणजे, मंजुरी मिळालेल्या या रस्त्यांचा सिंहस्थ कुंभमेळ्याशी थेट संबंध दिसून येत नसताना कुंभमेळ्याच्या दृष्टीने महत्त्वाच्या ओझर - शिर्डी मार्गाचा प्रस्ताव रखडल्याने निधीवाटपाच्या निकषांवर प्रश्नचिन्ह निर्माण झाले आहे. राष्ट्रवादी काँग्रेसच्या आमदारांनी विकासकामांसाठी निधी मिळत नसल्याबाबत उपमुख्यमंत्री सुनेत्रा पवार यांच्याकडे नाराजी व्यक्त केल्याची चर्चाही यापूर्वी झाली होती.
हेही वाचा
क्लस्टर पुनर्विकासाच्या अटी शिथिल
आंतरराष्ट्रीय फुटबॉलमधून निवृत्ती जाहीर
अमेरिकेत दिवाळीसाठी टपाल तिकीट
पोलिस पथकावर केला हल्ला
टँकरची संख्या ५६० च्या घरात
‘जनादेशात भेसळ’
नवीन अभ्यासक्रमांना विद्यापीठाची मान्यता
रोनाल्डो पर्वाची अखेर
‘माथाडी कायद्याची अंमलबजावणी करा’
शहर, जिल्ह्यात वसुबारस उत्साहात