लष्कराने कर्नल प्रसाद पुरोहित यांना ब्रिगेडियर पदावर पदोन्नतीसाठी मंजुरी दिली आहे. २००८ च्या मालेगाव स्फोट प्रकरणाशी संबंधित दीर्घकाळ चाललेल्या कायदेशीर प्रकरणानंतर त्यांची गेल्या वर्षी निर्दोष मुक्तता करण्यात आली होती.
कर्नल पुरोहित यांना २००८ मध्ये अटक करण्यात आली होती आणि २०१७ मध्ये सर्वोच्च न्यायालयाने त्यांना जामीन मंजूर करेपर्यंत ते कोठडीत होते. त्यानंतर पुरोहित यांनी पुन्हा भारतीय लष्करात सेवा सुरू केली. जुलै, २०२५ मध्ये मुंबईतील विशेष एनआयए न्यायालयाने त्यांची मालेगाव स्फोट प्रकरणातून निर्दोष मुक्तता केली. त्यानंतर २५ सप्टेंबर २०२५ राेजी पुराेहित यांचीलेफ्टनंट कर्नलपदावरून कर्नलपदी बढती करण्यात आली होती. पुरोहित यांनी ब्रिगेडियर या पदावर पदोन्नतीची मागणी याचिकेद्वारे केली होती. मालेगाव स्फोट प्रकरणात अटकेमुळे आणि त्यानंतर झालेल्या दीर्घ न्यायालयीन प्रक्रियेचा त्यांच्या कारकीर्दीवर प्रतिकूल परिणाम झाला, असा त्यांचा युक्तिवाद होता.
या याचिकेवर सुनावणी झाल्यानंतर सशस्त्र दल न्यायाधिकरणाने ३१ मार्च २०२६ रोजी नियोजित असलेली त्यांची निवृत्ती स्थगित केली होती. आता त्यांना ब्रिगेडियरपदी पदोन्नती मिळाल्याने पुरोहित यांची निवृत्ती टळून त्यांचा सेवाकाळ वाढला आहे.
