निव्वळ भ्याडपणा

आत्महत्या आणि हिंसेच्या वाढत्या घटनांनी समाजाला हादरवून सोडले आहे. मालेगावचे सतीश कलंत्री यांनी यावर चिंता व्यक्त केली आहे. त्यांच्या मते, संयमाचा अभाव आणि संकटांना सामोरे जाण्याची मानसिकता नसणे हे आत्महत्येचे मुख्य कारण आहे. आठवीतील मुलाने मित्राची हत्या करणे हे आजच्या पिढीच्या हातून निसटून जाण्याचे लक्षण आहे, ज्याला पालकांचे दुर्लक्ष कारणीभूत आहे. दुसरीकडे, नाशिकचे भास्कर जाधव यांनी क्रिकेटपटू संजू सॅमसनच्या झुंजार खेळीचे कौतुक केले आहे. विंडीजविरुद्धच्या टी-ट्वेंटी वर्ल्डकप सामन्यात दबावाखालीही त्याने दाखवलेला आत्मविश्वास आणि जागतिक दर्जाची गुणवत्ता विजयासाठी निर्णायक ठरली. तर, पुण्यातील पुरुषोत्तम आठलेकर यांनी जागतिक युद्धाच्या पार्श्वभूमीवर चिंता व्यक्त केली आहे. युद्धाचा आगडोंब लांबल्यास त्याचा परिणाम केवळ भारतावरच नव्हे, तर संपूर्ण जगाच्या अर्थव्यवस्थेवर, परराष्ट्र धोरणावर आणि सुरक्षेवर होईल, असे त्यांनी म्हटले आहे. अमेरिकेचे अध्यक्ष डोनाल्ड ट्रम्प हे आपल्या देशातील अपयश लपवण्यासाठी युद्धाचा वापर करत असल्याचा अंदाजही त्यांनी व्यक्त केला आहे.

सतीश कलंत्री यांनी म्हटले आहे की, ‘प्रेयसीची हत्या करून प्रियकराची आत्महत्या’, ‘आठवीत शिकणार्‍या मुलाची मित्राकडून हत्या’ व ‘रेल्वेखाली वडिलांनी आपल्या मुलाला सोबत घेऊन जीवन संपविले’ ह्या बातम्या वाचून मनाला चटका लागला. या भ्याडपणाबद्दल रागही आला. आता आत्महत्या करण्याचे प्रमाण जास्तच वाढले असून, संयमाचा अभाव, संकटाना सामोरे जाण्यासाठी लागणारी मानसिकता लोप पावली आहे, हे मुख्य कारण आहे. संसार करताना अनेक संकटाना सामोरे जावे लागते. अडचणीतून मार्ग निघतो पण आत्महत्या हा कधीच पर्याय होऊ शकत नाही. आठवीत शिकणार्‍या मुलाने आपल्या मित्राची हत्या करावी, ह्यावरून आजची पिढी आपल्या हातून निघून जात आहे, हेच सिद्ध होते. पालकांचे अक्षम्य दुर्लक्ष हे सुद्धा महत्त्वाचे कारण आहे. मुलांच्या वागण्याकडे पालकांनी तसेच शिक्षकांनी लक्ष द्यायला हवे.

भास्कर जाधव यांनी सकारात्मकतेतून विजयाचे उदाहरण दिले आहे. परवा टी-ट्वेंटी वर्ल्डकप स्पर्धेत उपान्त्य फेरी गाठण्यासाठी भारताला विंडीज विरुद्ध विजय आवश्यक असताना व जवळपास दोनशे धावांचे विजयी लक्ष्य गाठण्यासाठी दडपण झुगारून देणे आवश्यक होते. एकीकडे विकेट पडत असताना संजूने सलामीला येत शेवटपर्यंत झुंजार फलंदाजी केली, वेळप्रसंगी आक्रमक बाणाही दाखवित विंडीजचा तोफखाना परतून लावला व चार चेंडू व पाच विकेट राखून विजयश्री खेचून आणली, संजू सॅमसनने आपली जागतिक दर्जाची गुणवत्ताही सिद्ध केली. खेळाडूंच्या खेळामध्ये चढउतार होतच असतात. न्यूझीलंडविरुद्ध हा दर्जेदार खेळाडू चांगल्या कामगिरीसाठी झगडत असताना त्याच्यावर दाखविलेला विश्वास त्याने सार्थ करून दाखविला.

पुरुषोत्तम आठलेकर यांनी युद्धाच्या परिणामांवर प्रकाश टाकला आहे. ‘युद्धाचा आगडोंब’ हा अग्रलेख वाचला. एकूणच या युद्धाची पार्श्वभूमी आणि अमेरिकेची वर्चस्ववादी भूमिका पाहता, हे युद्ध लांबल्यास त्याचे परिणाम केवळ भारतावरच नव्हे, तर संपूर्ण जगावर होतील. आज जवळपास आठ ते दहा देश युद्धाच्या खाईत लोटले गेले आहेत. अशा परिस्थितीचा उपयोग अमेरिकेचे अध्यक्ष डोनाल्ड ट्रम्प आपल्या देशातील ध्येय-धोरणांतील अपयश झाकण्यासाठी करत आहेत, असे जाणवते. युद्धाचा आगडोंब अधिक काळ धगधगत राहिला, तर त्याचे परिणाम भारताच्या अर्थव्यवस्थेवर, परराष्ट्र धोरणावर आणि सुरक्षेवर नक्कीच होतील.