‘‘जर्नी ऑफ सायलेंट व्हिल्स’ परिणामकारक’

नागपूर: हजारीपहाड येथील अलग अँगल कम्युनिटी आर्ट सेंटरमध्ये डॉ. दिनू घाटा यांच्या 'रिपोझ' तंत्रज्ञानाचा वापर करून साकारलेल्या 'जर्नी ऑफ सायलेन्ट व्हिल्स' या शिल्प प्रदर्शनाचे उद्घाटन ज्येष्ठ आर्किटेक्ट प्रद्युम्न सहस्रभोजनी यांच्या हस्ते झाले. या प्रदर्शनातून कुंभार समुदायाची व्यथा प्रभावीपणे मांडण्यात आली आहे. हे प्रदर्शन १५ मार्चपर्यंत सायंकाळी ४ ते ७ या वेळेत प्रेक्षकांसाठी खुले राहणार आहे.

प्रद्युम्न सहस्रभोजनी यांनी डॉ. घाटा यांच्या कामाचे कौतुक केले. ते म्हणाले की, 'रिपोझ' या माध्यमात काम करणारे कलाकार आता कमी झाले आहेत. डॉ. घाटा यांनी शिल्पाद्वारे कुंभार समुदायाची मांडलेली व्यथा फार परिणामकारक आणि विचारप्रवृत्त करणारी आहे.

डॉ. घाटा यांनी मनोगतात सांगितले की, तंत्रज्ञानाच्या बदलामुळे कुंभार समुदाय ाचे पारंपरिक काम कमी होत चालले आहे. ते म्हणाले, ‘तंत्रज्ञान संक्रमणाच्या काळात पूर्वी कुंभार समुदाय करायचे ते काम आता फार कमी होत चालले आहे. माती फिरवणारे चक्र मूक होत आहे.’

या प्रदर्शनाचे आयोजन डीआयवाय आर्ट लॅबतर्फे करण्यात आले आहे. या प्रदर्शनाच्या उद्‌घाटनप्रसंगी खैरागड विद्यापीठाचे माजी अधिष्ठाता प्रो. एस. पी. चौधरी हे प्रमुख पाहुणे म्हणून उपस्थित होते. शासकीय कला व अभिकल्प महाविद्यालयाचे अधिष्ठाता डॉ. विश्वनाथ साबळे, ज्येष्ठ शिल्पकार हिराचंद विकमशी, चित्रकार सदानंद चौधरी, बबन बेसेकर आदी मान्यवरही उपस्थित होते.

डॉ. घाटा यांनी तांबे या धातूचा वापर करून 'रिपोझ' या तंत्रज्ञानाने ही शिल्पे साकारली आहेत. 'रिपोझ' हे एक असे तंत्र आहे, ज्यामध्ये धातूला वितळवून विशिष्ट आकार दिला जातो. 'जर्नी ऑफ सायलेन्ट व्हिल्स' हे या शिल्प प्रदर्शनाचे शीर्षक आहे.