‘वन बॅटल आफ्टर अनदर’ची बाजी

९८ व्या अकादमी पुरस्कार सोहळ्यात अनेक महत्त्वाचे क्षण अनुभवले गेले. जेसी बकली हिला शेक्सपियरच्या पत्नीच्या भूमिकेसाठी सर्वोत्तम अभिनेत्रीचा पुरस्कार मिळाला, तर एमी मॅडिगनने ‘वेपन्स’मधील भूमिकेसाठी सहायक अभिनेत्रीचा पुरस्कार पटकावला. नॉर्वेचा ‘सेंटिमेंटल व्हॅल्यू’ चित्रपट सर्वोत्कृष्ट आंतरराष्ट्रीय चित्रपट ठरला. प्रियांका चोप्रा-जोनासने हॅव्हिएर बार्डेमसोबत पुरस्कार प्रदान केला, पण बार्डेमच्या युद्धविरोधी घोषणेमुळे हा सोहळा चर्चेत राहिला. दुसरीकडे, दिग्गज अभिनेते धर्मेंद्र यांना ‘इन मेमोरियम’ यादीत स्थान न मिळाल्याने भारतीयांनी नाराजी व्यक्त केली.

या वर्षीच्या ९८ व्या अकादमी पुरस्कार सोहळ्यात अभिनेत्री जेसी बकलीने सर्वांचे लक्ष वेधून घेतले. शेक्सपियरच्या पत्नीच्या भूमिकेत तिने केलेल्या अभिनयासाठी तिला सर्वोत्तम अभिनेत्रीचा पुरस्कार मिळाला. विशेष म्हणजे, ऑस्कर जिंकणारी ती पहिली आयरिश कलाकार ठरली. तिने हा पुरस्कार ‘देशातील मातांना’ समर्पित केला. सहायक अभिनेत्रीचा पुरस्कार ‘वेपन्स’ चित्रपटातील भूमिकेसाठी एमी मॅडिगनला मिळाला. आंतरराष्ट्रीय चित्रपट विभागात नॉर्वेचा ‘सेंटिमेंटल व्हॅल्यू’ हा चित्रपट सर्वोत्कृष्ट ठरला.

भारतीयांसाठी हा सोहळा खास ठरला, कारण अभिनेत्री प्रियांका चोप्रा-जोनासने अभिनेते हॅव्हिएर बार्डेमसोबत सर्वोत्कृष्ट आंतरराष्ट्रीय चित्रपटाचा पुरस्कार प्रदान केला. मात्र, बार्डेमने व्यासपीठावर येताच ‘नो टू वॉर, फ्री पॅलेस्टाइन’ अशी घोषणा केली. त्याने आपल्या सूटवर ‘नो अ ला गेरा’ (युद्ध नको) असा युद्धविरोधी संदेश असलेला पॅच लावला होता. हा नारा २००३ मध्ये इराक युद्धाच्या निषेधार्थ वापरला गेला होता. बार्डेमच्या या कृतीमुळे प्रियांकाच्या उपस्थितीचा क्षण सोशल मीडियावर आणि सर्वत्र चर्चेचा विषय ठरला. प्रियांका तब्बल दहा वर्षांनंतर ऑस्करच्या मंचावर दिसली होती.

दरवर्षी पुरस्कार सोहळ्यात वर्षभरात निधन झालेल्या कलाकारांना श्रद्धांजली वाहिली जाते. मात्र, यावर्षी बॉलिवूडचे दिग्गज अभिनेते धर्मेंद्र यांचा ‘इन मेमोरियम’ या श्रद्धांजलीच्या यादीत समावेश करण्यात आला नाही. यामुळे अनेक कलाकारांसह भारतीयांनी तीव्र नाराजी व्यक्त केली.

भारतीय वंशाच्या चित्रपट निर्मात्या गीता गांधभीर यांच्या ‘द डेव्हिल इज बिझी’ या चित्रपटाला सर्वोत्कृष्ट लघुपटासाठी आणि ‘द परफेक्ट नेबर’ला सर्वोत्कृष्ट माहितीपटासाठी नामांकन मिळाले होते. मात्र, त्यांना पुरस्कार जिंकता आला नाही, ज्यामुळे भारतीयांची निराशा झाली.

पुरस्कार विजेत्यांची यादी खालीलप्रमाणे आहे:
सर्वोत्कृष्ट चित्रपट : वन बॅटल आफ्टर अनदर
सर्वोत्कृष्ट दिग्दर्शक : पॉल थॉमस अँडरसन (वन बॅटल आफ्टर अनदर)
सर्वोत्कृष्ट अभिनेता : मायकेल बी. जॉर्डन (सिनर्स)
सर्वोत्कृष्ट अभिनेत्री : जेसी बकली (हॅम्नेट)
सर्वोत्कृष्ट सहाय्यक अभिनेत्री : एमी मॅडिगन (वेपन्स)
सर्वोत्कृष्ट सहाय्यक अभिनेता : शॉन पेन (वन बॅटल आफ्टर अनदर)
सर्वोत्कृष्ट आंतरराष्ट्रीय चित्रपट : सेंटिमेंटल व्हॅल्यू (नॉर्वे)