शस्त्र परवाना नूतनीकरणासाठी आवश्यक असलेला वैद्यकीय दाखला देण्यासाठी लाच घेणाऱ्या मुरबाड ग्रामीण रुग्णालयातील वैद्यकीय अधिकाऱ्यास लाचलुचपत प्रतिबंधक विभागाने ( एसीबी ) ताब्यात घेतले. या प्रकरणी रुग्णवाहिकेच्या चालकासह या अधिकाऱ्यावर मुरबाड पोलिस ठाण्यात गुन्हा दाखल करण्यात आला आहे.
मुरबाड तालुक्यात राहणाऱ्या तक्रारदारास त्यांच्या वडिलांच्या शस्त्र परवान्याचे नूतनीकरण करायचे होते. त्यासाठी आवश्यक असलेला वैद्यकीय दाखला देण्यासाठी मुरबाड ग्रामीण रुग्णालयात गेले असता, १०८ रुग्णवाहिकेवरील चालक महेंद्र हिंदुराव याने वैद्यकीय अधिकारी अनिल पटेल यांच्यासाठी लाच मागितली. ही लाच स्वीकारताना पटेल यांना एसीबीने ताब्यात घेतले. या प्रकरणी पटेल यांच्यासह हिंदुराव या दोघांविरुद्ध गुन्हा दाखल करण्यात आला आहे.
