छत्रपती संभाजीनगर : मिटमिटा येथील सफारी पार्क दिवाळी पर्यंत नागरिकांसाठी खुले करण्याचे संकेत शुक्रवारी देण्यात आले. दिवाळीपर्यंत हे पार्क खुले करण्याच्या दृष्टीने नियोजन करावे, वृक्षारोपण करावे अशा सूचना पदाधिकाऱ्यांनी अधिकाऱ्यांना दिल्या.
सफारी पार्कच्या कामाची पाहणी महापौर समीर राजूरकर, उपमहापौर राजेंद्र जंजाळ, अनिल मकरिये, अब्दुल समीर, गणेश लोखंडे, आयुक्त अमोल येडगे यांनी केली. सफारी पार्कच्या कामाचे सल्लागार ब्रिजेश शर्मा यांनी सादरीकरण केले. सफारी पार्कमधील सोयीसुविधांची माहिती त्यांनी दिली. कामाबद्दल पदाधिकाऱ्यांनी समाधान व्यक्त केले. दिवाळीपर्यंत हे पार्क सुरू करण्याच्या दृष्टीने नियोजन करण्याचे आदेश पदाधिकाऱ्यांनी दिले. पार्कचा परिसर प्लास्टिकमुक्त असला पाहिजे याची काळजी घ्या, असे आदेश आयुक्तांनी दिले. सिद्धार्थ उद्यानातील प्राणिसंग्रहालयाचे स्थलांतर सफारी पार्कच्या जागेत सप्टेंबरमध्ये करण्याच्या दृष्टीने नियोजन करण्याची सूचना करण्यात आली.
