अक्षय्य तृतीयेनिमित्त श्रीमंत दगडूशेठ हलवाई गणपती मंदिरात दर्शनासाठी भाविकांची होणारी गर्दी विचारात घेऊन शहराच्या मध्यवर्ती भागातील वाहतूक व्यवस्थेत आज, रविवारी बदल करण्यात येणार आहेत. श्री छत्रपती शिवाजी महाराज रस्त्यावरील वाहतूक पर्यायी मार्गाने वळविण्यात येणार आहे.
‘अक्षय्य तृतीयेनिमित्त श्रीमंत दगडूशेठ हलवाई गणपती मंदिरात भाविकांची दर्शनासाठी गर्दी होते. रविवारी पहाटेपासून विविध धार्मिक कार्यक्रमांचे आयोजन मंदिरात करण्यात आले आहे; तसेच भगवान परशुराम जन्मोत्सवानिमित्त मध्यभागातून दुचाकी फेरी काढण्यात येणार आहे. भाविकांची दर्शनासाठी होणारी गर्दी विचारात घेऊन रविवारी सकाळपासून मध्यभागातील वाहतूक व्यवस्थेत बदल करण्यात येणार आहेत. वाहनचालकांनी पर्यायी मार्गांचा वापर करावा,’ असे आवाहन पुणे पोलिसांच्या वाहतूक शाखेचे उपायुक्त हिंमत जाधव यांनी केले आहे.
