अंजनगाव सुर्जी येथील एका परीक्षा केंद्रावर इयत्ता दहावीच्या परीक्षेतील इंग्रजी विषयाच्या दोन उत्तरपत्रिका कस्टडीत जमा न करता दडवून ठेवल्याची घटना भरारी पथकाच्या तपासणीत समोर आली. या प्रकरणी परीरक्षक सुधीर खोडे, सहपरीरक्षक सुशीलकुमार अभ्यंकर, अनिल हाडोळेसह पाच जणांविरुद्ध गुन्हा दाखल करण्यात आला आहे. यातील खोडे व हडोळे या दोघांना अटक करण्यात आली. अभ्यंकर फरारी आहे.
भरारी पथकाने २७ फेब्रुवारीला सायंकाळी सुमारे ४.४० वाजता परीक्षा केंद्रावर दाखल झाले. त्यावेळी दहावीचा इंग्रजी विषयाचा पेपर सुरू होता. पेपर संपल्यानंतर उत्तरपत्रिका मोजून सील करण्यास विलंब होत होता. अनिल हाडोळे नामक कर्मचारी संशयास्पद हालचाली करताना आढळला. तपासणीत त्याच्या शर्टमध्ये दडवून ठेवलेल्या दोन उत्तरपत्रिका सापडल्या. त्यापैकी एक इंग्रजी माध्यमाची, तर दुसरी उर्दू माध्यमाची असल्याचे समोर आले.
