‘जिओ प्लॅटफॉर्म्स’च्या आयपीओसाठी तिप्पट भरणा

Contributed by: वृत्तसंस्था,नवी दिल्ली|महाराष्ट्र टाइम्स.कॉम•
jio platforms ipo secures triple subscription hitting new heights
‘जिओ प्लॅटफॉर्म्स लिमिटेड’ने बुधवारी प्रारंभिक भागविक्री (आयपीओ) किरकोळ गुंतवणूकदारांसाठी खुली केली. त्याआधी हा ‘आयपीओ’ अँकर गुंतवणूकदारांसाठी खुला झाला होता. ‘आयपीओ’ किरकोळ गुंतवणूकदारांसाठी खुला झाल्यानंतर १०० मिनिटांत त्यासाठी संपूर्ण भरणा झाला. ‘आयपीओ’द्वारे ३०,२१३ कोटी रुपयांच्या भांडवल उभारणीचे लक्ष्य ठेवण्यात आले आहे. प्रत्यक्षात अँकर गुंतवणूकदारांसह सुमारे ७४,६१० कोटी रुपयांच्या बोली आल्या आहेत. संपूर्ण भरणा झालेला हा देशातील सर्वांत वेगवान ‘आयपीओ’ ठरला.

संध्याकाळी पाच वाजेपर्यंत ‘आयपीओ’साठी ३.०१ पट भरणा झाला. ‘आयपीओ’अंतर्गत उपलब्ध असलेल्या १९.७५ कोटी समभागांच्या तुलनेत ५९.४४ कोटी समभागांसाठी बोली लागली. १,११९ रुपयांच्या वरच्या किंमतपट्ट्यानुसार सार्वजनिक बोलींचे मूल्य सुमारे ६६,५०० कोटी रुपये होते; अँकर वाटपातून ८,११० कोटी रुपयांची भर पडली. पात्र संस्थात्मक गुंतवणूकदारांचा हिस्सा ९.०२ पट भरला. देशांतर्गत वित्तीय संस्थांनी २५.०२ कोटी, परदेशी संस्थांनी १५.१४ कोटी आणि म्युच्युअल फंडांनी ३.१९ कोटी शेअर्ससाठी बोली लावली. बिगर-संस्थात्मक हिस्सा १.५८ पट, कर्मचारी आरक्षण १.३० पट आणि भागधारक आरक्षण १.३८ पट सबस्क्राइब झाले. किरकोळ भरणा केवळ ०.६८ पटच झाला.

हेही वाचा