रोहित शर्मा आणि विराट कोहलीच्या भव्य भागीदारीमुळे भारताने ऑस्ट्रेलियावर शानदार विजय मिळवला

सिडनी येथे झालेल्या तिसऱ्या एकदिवसीय सामन्यात ऑस्ट्रेलियावर भारताचा ९ गडी राखून दणदणीत विजय मिळवला. या विजयाचे शिल्पकार ठरले रोहित शर्मा आणि विराट कोहली . रोहितने नाबाद १२१ धावांची शतकी खेळी केली, तर विराट कोहलीने नाबाद ७४ धावा केल्या. या दोघांच्या १८३ धावांच्या भक्कम भागीदारीमुळे भारताने ऑस्ट्रेलियाने दिलेले २३६ धावांचे लक्ष्य सहज पार केले. या विजयामुळे भारताने मालिका क्लीन स्वीप होण्यापासून स्वतःला वाचवले.

भारतीय क्रिकेटपटू रविचंद्रन अश्विनने रोहित शर्माच्या शतकाचे आणि विराट कोहलीच्या ७४ धावांच्या खेळीचे कौतुक केले. रोहितने १२५ चेंडूंमध्ये १३ चौकार आणि ३ षटकारांसह १२१ धावा केल्या. तर विराट कोहलीने ८१ चेंडूंमध्ये ७ चौकारांसह ७४ धावांची महत्त्वपूर्ण खेळी केली. यापूर्वीच्या दोन सामन्यांमध्ये या दोघांनाही चांगली कामगिरी करता आली नव्हती. मात्र, या सामन्यात त्यांनी उत्कृष्ट पुनरागमन केले.

रोहितच्या फिटनेसवर अश्विनने विशेष भर दिला. "रोहित खूप फिट आणि सडपातळ दिसत होता. त्यामुळेच तो धावा करू शकला आणि चांगला खेळू शकला. गिलसोबत तिसऱ्या धावेसाठी धावताना तो उत्सुक होता, पण गिलने नकार दिला. त्याची फलंदाजीची गुणवत्ता नेहमीच होती, पण जेव्हा तुम्ही फिट असता, वजन कमी करता, तेव्हा तुम्ही हलके अनुभवता आणि तुमची कौशल्ये अधिक प्रभावी ठरतात. रोहित एकदम फिट दिसत आहे. तो पूर्णपणे तयार आणि आत्मविश्वासाने खेळत आहे," असे अश्विन म्हणाला.

अश्विनने रोहितच्या खेळाचे कौतुक करताना म्हटले की, "तो गेल्या दशकातील सर्वोत्तम व्हाईट-बॉल फलंदाजांपैकी एक आहे. मला नेहमीच खात्री होती की तो आणि विराट दोघेही धावा करतील. विराट पूर्ण फॉर्ममध्ये नव्हता, तरीही त्याने धावा काढण्याचा मार्ग शोधला. त्याने मारलेला स्ट्रेट ड्राईव्ह पाहण्यासारखा होता. त्याचे सर्व चाहते आज खूप आनंदी असतील. विराट खूप एन्जॉय करत असल्याचे दिसत होते. मला वाटते की आता त्याच्या मनात हे आले आहे की तो जे काही खेळत आहे ते त्याच्यासाठी एक भेट आहे आणि त्याने त्याच्या कारकिर्दीच्या या टप्प्याचा आनंद घेतला पाहिजे. जेव्हा त्याने पहिली सिंगल घेतली तेव्हा संपूर्ण स्टेडियम टाळ्या वाजवत होते."

ऑस्ट्रेलियाने नाणेफेक जिंकून प्रथम फलंदाजी केली आणि २३६ धावा केल्या. मिचेल मार्श (४१) आणि ट्रॅव्हिस हेड (२९) यांनी ६१ धावांची भागीदारी करून चांगली सुरुवात करून दिली. मॅट शॉर्टने ३० धावा केल्या, तर मॅट रॅनशॉ (५६) आणि ऍलेक्स कॅरी (२४) यांनी ५९ धावांची भागीदारी केली. यानंतर मात्र ऑस्ट्रेलियाचा संघ पत्त्याच्या बंगल्यासारखा कोसळला.

भारताच्या गोलंदाजीचे नेतृत्व हर्षित राणाने केले. त्याने ८.४ षटकांमध्ये ३९ धावा देऊन ४ बळी घेतले. वॉशिंग्टन सुंदरने दोन बळी घेतले, तर मोहम्मद सिराज, प्रसिद्ध कृष्णा, अक्षर पटेल आणि कुलदीप यादव यांनी प्रत्येकी एक बळी घेतला.

भारताच्या डावात, शुभमन गिल (२४) आणि रोहित शर्मा यांनी ६९ धावांची सलामी भागीदारी केली. गिल बाद झाल्यानंतर रोहित आणि विराट कोहली यांच्या भागीदारीने भारताला ९ गडी राखून विजय मिळवून दिला.

रोहित शर्माला त्याच्या उत्कृष्ट कामगिरीसाठी सामनावीर (Player of the Match) आणि मालिकावीर (Player of the Series) या दोन्ही पुरस्कारांनी सन्मानित करण्यात आले. त्याने मालिकेत एकूण २०२ धावा केल्या, ज्यात एक शतक आणि एक अर्धशतक समाविष्ट होते.