मौल्यवान धातूंचे भाव वाढल्यामुळे २०२५-२६ या आर्थिक वर्षात देशाची सोन्याची आयात २४ टक्क्यांनी वाढून ७१.९८ अब्ज डॉलरच्या सर्वकालीक उच्चांकावर पोहोचली आहे. सन २०२४-२५ मध्ये सोन्याची आयात ५८ अब्ज डॉलर होती. २०२३-२४ मध्ये ती ४५.५४ अब्ज डॉलर आणि २०२२-२३ मध्ये ३५ अब्ज डॉलर होती. ही माहिती केंद्रीय वाणिज्य मंत्रालयाने शुक्रवारी जाहीर केली.
एकूण प्रमाणात (व्हॉल्यूम) विचार करता, सोन्याच्या आयातीत ४.७६ टक्क्यांची घट होऊन ती ७२१.०३ टनांवर आली आहे. २०२४-२५ मध्ये ही आयात ७५७.०९ टन होती. त्याचप्रमाणे, गेल्या आर्थिक वर्षात चांदीचा भाव वाढल्यामुळे चांदीची आयात सुमारे १५० टक्क्यांनी वाढून १२ अब्ज डॉलरवर पोहोचली आहे. प्रमाणाचा विचार करता, सन २०२५-२६ मध्ये त्यात ४२ टक्क्यांची वाढ होऊन ती ७,३३४.९६ टनांवर पोहोचली. मंत्रालयाच्या आकडेवारीनुसार, या मौल्यवान धातूंच्या वाढत्या आयातीमुळे २०२५-२६ मध्ये देशाची व्यापारी तूट (आयात आणि निर्यात यातील फरक) ३३३.२ अब्ज डॉलरवर पोहोचली आहे.
चीननंतर भारत हा जगातील सोन्याचा दुसरा सर्वांत मोठा ग्राहक आहे. देशात होणारी सोन्याची आयात प्रामुख्याने दागिने उद्योगाची मागणी पूर्ण करते. या आयातीचा भारताच्या चालू खात्यातील तुटीवर परिणाम होतो. रिझर्व्ह बँकेने दोन मार्च रोजी प्रसिद्ध केलेल्या आकडेवारीनुसार, अमेरिकेला होणाऱ्या निर्यातीत घट झाल्यामुळे निर्माण झालेल्या उच्च व्यापारी तुटीमुळे, डिसेंबर तिमाहीत भारताची चालू खात्यातील तूट मागील वर्षीच्या याच कालावधीतील ११.३ अब्ज डॉलरवरून वाढून १३.२ अब्ज डॉलर (जीडीपीच्या १.३ टक्के) झाली आहे.
मौल्यवान धातूंच्या वाढत्या किमती असूनही सोन्याची ही विक्रमी आयात भारतीयांचे या धातूवरील अढळ प्रेम अधोरेखित करते. मात्र, वाढत्या आयातीमुळे परकीय चलन साठ्यावर पडणारा ताण आणि व्यापारी तुटीतील वाढ ही चिंतेची बाब ठरत आहे.
