कच्च्या तेलाच्या किमतीत झालेली घसरण आणि इराण-अमेरिका दरम्यानच्या शांतता चर्चेत प्रगती होण्याच्या आशेने मंगळवारी, सलग तिसऱ्या दिवशी शेअर बाजारांत तेजी पाहायला मिळाली. बीएसई सेन्सेक्स ७५३.०३ अंकांनी उसळून ७९,२७३.३३वर स्थिरावला. दिवसभरात त्याने ८४६.७८ अंकांची झेप घेत ७९,३६७.०८चा टप्पा गाठला होता. एनएसी निफ्टी २११.७५ अंकांनी वधारून २४,५७६.६०वर बंद झाला.
सेन्सेक्समधील ३० कंपन्यांमध्ये ट्रेंटचा समभाग सर्वाधिक ३.५५ टक्क्यांनी वधारला. त्याखालोखाल हिंदुस्थान युनिलिव्हर, आयसीआयसीआय बँक, बजाज फायनान्स, एचडीएफसी बँक आणि ॲक्सिस बँक यांचेही समभाग वधारले. त्याचवेळी भारत इलेक्ट्रॉनिक्स, टायटन, रिलायन्स इंडस्ट्रीज आणि एनटीपीसी या कंपन्यांचे समभाग घसरले. जागतिक तेल बाजारात ब्रेन्ट क्रूडचा वायदा दर प्रतिबॅरल ०.७५ टक्क्यांनी घसरून ९४.७६ डॉलरवर गेला.
मिडकॅप सिलेक्ट इंडेक्स ०.७३ टक्के आणि स्मॉलकॅप सिलेक्ट इंडेक्स ०.२९ टक्क्यांनी वधारले. क्षेत्रीय निर्देशांकांमध्ये एफएमसीजी क्षेत्रात सर्वाधिक २.२३ टक्के वाढ झाली. त्यापाठोपाठ स्थावर मालमत्ता (२.१७ टक्के), खासगी बँका (१.६७ टक्के) आणि बँकेक्स (१.४६ टक्के) हे निर्देशांक वधारले. यंत्रसामग्री हा एकमेव क्षेत्रीय निर्देशांक घसरला.
मुंबई शेअर बाजारात (बीएसई) एकूण २,५३१ कंपन्यांचे समभाग वधारले, १,७६० कंपन्यांचे समभाग घसरले आणि १६२ कंपन्यांच्या समभागांमध्ये कोणताही बदल झाला नाही. बीएसईच्या आकडेवारीनुसार, विदेशी संस्थागत गुंतवणूकदारांनी सोमवारी १,०५९.९३ कोटी रुपयांच्या समभागांची विक्री केली.
