न्हाळा सुरू झाला, की गव्हाच्या चिकाची व त्याचबरोबर आईची आठवण येते. आई तिखट चिक खूप छान करायची. तो पौष्टिक असल्यानं उन्हाळ्यात तीन-चार वेळा तरी व्हायचाच! आईकडून मीही शिकले आणि सर्व जण आवडीनं खातात, म्हणजे आईसारखा जमत असावा.
तिखट चिकाची कृती पुढीलप्रमाणे : गव्हाचा आणि कुरडईसाठी करतो, तो चिक एक वाटी, त्यात पाव वाटी डाळीचं पीठ घालावं व ते चांगलं एकत्र करावं. मिश्रण घट्ट वाटल्यास थोडं पाणी घालून सरसरीत करावं. मग कढईत तेल घालून त्यात मोहरी, हिंग, हळद, हिरवी मिरची व कढीपत्ता टाकावा. त्या नंतर चिकाच्या मिश्रणाच्या तिप्पट पाणी घालावं. त्यात चवीनुसार मीठ घालावं व पाण्याला उकळी आल्यावर चिकाचं मिश्रण त्यात टाकावं. एकसारखे हलवून दहा मिनिटं चांगलं शिजल्यावर त्यात भरपूर कोथिंबीर घालावी. एक वाफ आल्यावर गॅस बंद करावा व झाकण ठेवून पाच मिनिटं मुरू द्यावं; गरम गरम सर्व्ह करावं, चटकदार पौष्टिक तिखट चिक तयार!
