मिरा रोडमध्ये दोन सुरक्षारक्षकांवर एकाने चाकूने हल्ला केल्याची घटना सोमवारी पहाटे घडली. यात एक जण जबर तर, दुसरा किरकोळ जखमी झाला आहे. याप्रकरणी गुन्हा दाखल करत ३१ वर्षीय तरुणाला पोलिसांनी अटक केली आहे. याचा राज्य दहशतवादी विरोधी पथकाकडूनही तपास केला जात आहे.
मिरा रोडच्या नयानगर येथील एका मोठ्या खासगी रुग्णालयाच्या इमारतीमागे निवासी इमारत उभारण्याचे काम सुरू आहे. येथे सुरक्षेसाठी राजकुमार मिश्रा आणि सुब्रतो सेन सोमवारी पहाटे तैनात होते. येथे अज्ञात व्यक्तीने राजकुमार यांच्यावर प्रथम चाकूने हल्ला केला. त्यांना वाचवण्यासाठी सुब्रतो हे पुढे आले. त्यांच्यावरही त्याने हल्ला केला आणि पळ काढला.
हल्ल्यात राजकुमार हे जबर जखमी झाल्याने त्यांना जवळच्या खासगी रुग्णालयात दाखल करण्यात आले होते. नयानगर पोलिसांनी काही वेळातच हल्लेखोर जौब अन्सारीला अटक केली. तो एकटाच मिरा रोडमध्ये राहात असल्याचे कळते.
