शहाजहांपूर (उत्तर प्रदेश) : येथे पारंपरिक ‘ जुता मार होळी ’ मिरवणुकीच्या पार्श्वभूमीवर प्रशासनाने मार्गावरील मशिदी व मजारांना ताडपत्रीने झाकून सुरक्षित केले असून, यंदा वाढीव सुरक्षा व्यवस्था तैनात करण्यात आली आहे.
शहाजहांपूरमध्ये होळीच्या दिवशी साजरी होणारी ‘जुता मार होळी’ ही शेकडो वर्षांची परंपरा आहे. या मिरवणुकीत ब्रिटिश काळातील ‘लाट साहेब’ यांच्या वेशातील व्यक्ती बैलगाडीतून शहरात फिरतात. यावेळी नागरिक त्यांच्यावर चप्पल, जोडे फेकत रंगांची उधळण करतात. मागील वर्षी या मिरवणुकीदरम्यान काही ठिकाणी पोलिस कर्मचाऱ्यांवर चप्पल, बाटल्या फेकल्या गेल्याने सौम्य लाठीमार करावा लागला होता. यंदा चार अतिरिक्त पोलिस अधीक्षक, १३ वर्तुळ अधिकारी, ३१० उपनिरीक्षक, १,२०० शिपाई व ५०० होमगार्ड तैनात करण्यात आले आहेत.
इतिहासतज्ज्ञ डॉ. विकास खुराणा यांच्या मते, या मिरवणुकीची सुरुवात अठराव्या शतकात झाली. १७२८ मध्ये नवाब अब्दुल्ला खान शहाजहांपूरमध्ये परतले, त्या दिवशी होळी असल्याने हिंदू-मुस्लीम नागरिकांनी संयुक्त मिरवणूक काढली होती. ब्रिटिश काळात १८५९ नंतर या मिरवणुकीला औपचारिक स्वरूप मिळाले.
