ठाणे : गावदेवी परिसरात झालेल्या अग्निकांडात आग विझवण्याचे कर्तव्य बजावताना वीरमरण आलेले अग्निशमन दलाचे जवान सागर शिंदे यांना ‘हुतात्मा’ घोषित करावे, अशी मागणी नगरसेवक सीताराम राणे यांनी महापालिका आयुक्तांकडे केली आहे.
गेल्या २१ मे रोजी गावदेवी मार्केटला भीषण आग लागली होती. यावेळी बचावकार्य करताना जवान सागर शिंदे यांना वीरमरण आले. मुंबई महापालिकेने काही वर्षांपूर्वी 'गोकुळ हाऊस' इमारतीला लागलेली आग विझवताना मृत्यूमुखी पडलेल्या अग्निशमन दलातील चार अधिकाऱ्यांना ‘हुतात्मा’ घोषित केले होते. त्याच धर्तीवर सागर शिंदे यांना ‘हुतात्मा’ घोषित करावे, अशी मागणी राणे यांनी पत्राद्वारे केली आहे.
