उपांत्यपूर्व फेरीतलक्ष्य सेन दाखल
महाराष्ट्र टाइम्स•
भारताचा बॅडमिंटनपटू लक्ष्य सेन ऑल इंग्लंड स्पर्धेच्या उपांत्यपूर्व फेरीत पोहोचला आहे. त्याने हाँगकाँगच्या एन्ग का लाँग अँगसचा पराभव केला. लक्ष्यने मागील चुकांमधून शिकत निर्णायक सेट जिंकला. आता त्याची पुढील लढत चीनच्या ली शी फेंग किंवा आयर्लंडच्या नहत न्गुयेन यांच्याशी होईल. लक्ष्यने विश्रांती घेऊन पुढील आव्हानासाठी सज्ज असल्याचे सांगितले आहे.
लक्ष्य सेनने ऑल इंग्लंड स्पर्धेत उपांत्यपूर्व फेरीत धडक मारल्याने भारतीय चाहत्यांमध्ये आनंदाचे वातावरण आहे. १२व्या क्रमांकावर असलेल्या लक्ष्यने हाँगकाँगच्या अँगसला कडवी झुंज देत पराभूत केले. पहिल्या सेटमध्ये २१-१९ असा विजय मिळवल्यानंतर दुसऱ्या सेटमध्ये अँगसने जोरदार पुनरागमन केले आणि २३-२१ असा सेट जिंकला. मात्र, निर्णायक तिसऱ्या सेटमध्ये लक्ष्यने जबरदस्त खेळ करत अँगसला संधी न देता २१-१० असा सेट जिंकून सामना खिशात घातला.सामन्यानंतर लक्ष्य सेन म्हणाला, ‘अतिशय जबरदस्त लढत झाली. अँगसने चांगली लढत दिली. त्याच्या खेळाचे कौतुक आहेच. त्याने दुसऱ्या सेटमध्ये जोरदार पुनरागमन केले होते. मला वाटते की मी दुसऱ्या सेटच्या शेवटी मोकळेपणाने खेळलो नाही आणि प्रतिस्पर्ध्याला संधी दिली.’ लक्ष्यने आपल्या चुका मान्य केल्या, पण निर्णायक सेटमध्ये अँगसला संधी न दिल्याचे समाधानही व्यक्त केले.
लक्ष्यची पुढील लढत चीनचा सहावा मानांकित ली शी फेंग आणि आयर्लंडचा नहत न्गुयेन यांच्यातील विजेत्याशी होणार आहे. या आव्हानात्मक लढतीसाठी लक्ष्यने विश्रांती घेण्यावर भर दिला आहे. तो म्हणाला, ‘मी चांगल्या लयीत आहे. विशेषतः गेल्या दोन सामन्यांमध्ये आणि मला आता पुरेशी विश्रांती घ्यावी लागणार आहे. कारण, मला आणखी एका आव्हानात्मक लढतीला सामोरे जायचे आहे. त्यामुळे विश्रांतीसाठी माझ्याकडे फक्त २४ तास आहेत आणि मग पूर्ण ताकदीने खेळायचे आहे.’
विशेष म्हणजे, लक्ष्यला अँगसविरुद्धच्या मागील तिन्ही लढतींमध्ये पराभव पत्करावा लागला होता. त्यामुळे या सामन्यात लक्ष्यवर दडपण असेल, अशी अपेक्षा होती. मात्र, त्याने आपल्या कौशल्याचा पुरेपूर वापर करत अँगसला निष्प्रभ केले आणि उपांत्यपूर्व फेरीत स्थान मिळवले.
हेही वाचा
पुण्याच्या लौकिकात भर घालणारे पाम उद्यान
सिग्नलची वेळ वाढवा
अप्रत्यक्ष पाणीकपातीला सुरुवात?
डॉ. आंबेडकर जयंतीसाठी शहराच्या वाहतुकीत बदल
९५ दिवसांत उभारली १४ मजली इमारत
उलगडणार ‘सालबर्डी’चं सत्य
धबधब्यात बुडून मृत्यू
सर्वंकष स्वच्छता मोहीम
‘भाकरीची शाळा’ सुरू
डोंबिवलीत अर्थसंवाद व्याख्यानमाला