विधानसभा निवडणुकीमध्ये घवघवीत यश मिळवूनही काँग्रेसकडून अद्याप मुख्यमंत्रिपदाबाबत अनिश्चितता कायम आहे. पक्षश्रेष्ठींनी केरळमधील वरिष्ठ नेत्यांशी संपर्क साधण्यास सुरुवात केली असून, चर्चेसाठी अनेक प्रमुख नेत्यांना दिल्लीला बोलावण्यात आले आहे, अशी माहिती पक्षाच्या सूत्रांनी दिली. केरळ काँग्रेसच्या माजी अध्यक्षांना राजधानीत उपस्थित राहण्यास सांगण्यात आल्याचे समजते. तर, ज्येष्ठ नेते के. सुधाकरन हे सोमवारी रात्री दिल्लीत दाखल होण्याची शक्यता आहे.
काँग्रेस नेते के. मुरलीधरन आणि मुल्लापल्ली रामचंद्रन यांच्यासह इतर नेत्यांशीही सोमवारी दिवसभरात संपर्क साधण्यात आला. नेतृत्वाच्या निवडीवरून निर्माण झालेला तिढा सोडवण्यावर या बैठकीत चर्चा होण्याची शक्यता आहे. ज्येष्ठ नेते रमेश चेन्नीथला, सरचिटणीस के. सी. वेणुगोपाल आणि विरोधी पक्षनेते व्ही. डी. सतीशन हे तीन नेते राज्याच्या मुख्यमंत्रिपदासाठी मोर्चेबांधणी करत आहेत. पक्षाच्या शीर्षस्थ नेतृत्वाने शनिवारी नवी दिल्ली येथे या तिन्ही नेत्यांची भेट घेतली.
