देशाचा परकीय चलनसाठा २२ मे रोजी संपलेल्या सप्ताहात ७.५११ अब्ज डॉलरने घटून ६८१.३८४ अब्ज डॉलरवर आला आहे, असे रिझर्व्ह बँकेने ( आरबीआय ) शुक्रवारी सांगितले. यापूर्वीच्या अहवाल सप्ताहात हा साठा ८.०९४ अब्ज डॉलरने घटून ६८८.८९४ अब्ज डॉलरवर आला होता.
आखातात युद्ध सुरू होण्यापूर्वी, यावर्षी २७ फेब्रुवारी रोजी संपलेल्या आठवड्यात परकीय चलनसाठ्याने ७२८.४९४ अब्ज डॉलरचा आत्तापर्यंतचा सर्वोच्च स्तर गाठला होता. मात्र, त्यानंतर संघर्ष सुरू झाल्यामुळे रुपयावर दबाव आला आणि आरबीआयला डॉलरची विक्री करून परकीय चलन बाजारात हस्तक्षेप करावा लागला. यामुळे सलग अनेक आठवडे या साठ्यात घट झाली.
रिझर्व्ह बँकेच्या आकडेवारीनुसार, २२ मे रोजी संपलेल्या आठवड्यात परकीय चलन मत्ता २.८७२ अब्ज डॉलरने कमी होऊन ५४३.०३२ अब्ज डॉलरवर आली आहे.
डॉलरच्या मूल्यात व्यक्त केलेल्या या परकीय चलन मत्तेमध्ये युरो, पौंड आणि येन यांसारख्या बिगर-अमेरिकी चलनांच्या मूल्यांमधील वाढ किंवा घसरण यांच्या प्रभावाचा समावेश असतो.
या आठवड्यात सोन्याच्या साठ्याचे मूल्यही ४.५३ अब्ज डॉलरने घटून ११४.७८६ अब्ज डॉलर झाले आहे, असे आरबीआयने सांगितले. बँकेच्या माहितीनुसार, विशेष आहरण अधिकार (एसडीआर) ७.७ कोटी डॉलरने घटून १८.७४८ अब्ज डॉलरवर आले आहेत.
