नवी दिल्ली : इंडिगो एअरलाइन्सला मार्च तिमाहीत २,५३६.९ कोटी रुपयांचा निव्वळ तोटा झाला आहे. गेल्यावर्षी याच तिमाहीत देशातील या सर्वांत मोठ्या विमान कंपनीला ३,०६७.५ कोटी रुपयांचा नफा झाला होता. मात्र, आर्थिक वर्ष २०२५-२६ च्या चौथ्या तिमाहीत कंपनीचे एकूण उत्पन्न ३ टक्क्यांहून अधिक वाढून २३,८३०.७ कोटी रुपयांवर पोहोचले आहे.
रुपया ५३ पैशांनी वधारला
मुंबई : अमेरिका आणि इराणमधील शांतता कराराबाबत निर्माण झालेल्या ताज्या सकारात्मकतेमुळे बाजारपेठेतील उत्साह वाढला असून, शुक्रवारी सुरुवातीच्या व्यवहारात अमेरिकन डॉलरच्या तुलनेत रुपया ५३ पैशांनी वधारून ९५.०५वर बंद झाला. आंतरबँक परकीय चलन बाजारात रुपया डॉलरच्या तुलनेत ९५.७७वर उघडला, त्यानंतर व्यवहारादरम्यान त्याने ९४.९७चा उच्चांक आणि ९५.७८चा नीचांक गाठला.
एआय कामगिरीमध्ये चौथ्या स्तरावर
नवी दिल्ली : 'आयसीआरआयईआर-प्रोसेस सेंटर फॉर इंटरनेट अँड डिजिटल इकॉनॉमी' द्वारे शुक्रवारी प्रसिद्ध करण्यात आलेल्या अहवालानुसार, भारत ही जगातील पाचवी सर्वांत मोठी डिजिटल अर्थव्यवस्था म्हणून समोर आली असून कृत्रिम बुद्धिमत्ता (एआय) कामगिरीमध्ये भारत जागतिक स्तरावर चौथ्या स्थानावर आहे.
