पश्चिम आशियातील परस्परविरोधी भू-राजकीय संकेत आणि परदेशी गुंतवणूकदारांच्या निधी काढण्याच्या पावित्र्यामुळे बुधवारी सलग दुसऱ्या दिवशी शेअर बाजार घसरणीसह बंद झाले. ‘सेन्सेक्स’ १४१.९० अंकांनी घसरून ७५,८६७.८०वर बंद झाला. ‘निफ्टी’ ६.५५ अंकांनी खाली येऊन २३,९०७.१५वर बंद झाला.
‘सेन्सेक्स’मधील एचडीएफसी बँकेचा समभाग सर्वाधिक २.६३ टक्क्यांनी घसरला. इन्फोसिस, आयटीसी, हिंदुस्थान युनिलिव्हर, रिलायन्स आणि आयसीआयसीआय बँक यांचेही समभाग घसरले.
पॉवरग्रिड, इटर्नल, एनटीपीसी आणि टाटा स्टील यांचे समभाग वधारले. ‘सेन्सेक्स’मधील २० कंपन्यांचे समभाग वधारले. सत्रांतर्गत व्यवहारांत एका क्षणी ‘सेन्सेक्स’ने ७६,२२४.६८चा उच्चांक आणि ७५,७४८.२१चा नीचांक गाठला होता. मंगळवारी ‘सेन्सेक्स’ ४७९.२६ अंकांनी आणि ‘निफ्टी’ ११८ अंकांनी घसरला होता.
क्षेत्रीय निर्देशांकांमध्ये वित्तीय, तेल व वायू, आयटी आणि खासगी बँकिंग क्षेत्रातील समभागांमध्ये मोठी घसरण झाली.
ऊर्जा, धातू आणि वाहन क्षेत्रातील समभागांमध्ये वाढ झाल्याने बाजारातील घसरण काहीशी मर्यादित राहिली.
बीएसई स्मॉलकॅप सिलेक्ट निर्देशांक ०.२९ टक्क्यांनी घसरला, तर मिडकॅप सिलेक्ट निर्देशांक ०.५२ टक्क्यांनी वाढला.
