ऑलिम्पिक क्रिकेट पात्रता जानेवारी-फेब्रुवारीत

नवी दिल्ली : लॉस एंजेलिसमध्ये २०२८मध्ये होणाऱ्या ऑलिम्पिकमधील क्रिकेट स्पर्धेसाठी पात्रता स्पर्धा जानेवारी-फेब्रुवारी २०२८मध्ये होतील. ‘क्रिकइन्फो’नुसार महिला आणि पुरुष अशा दोन्ही गटांच्या ऑलिम्पिक पात्रता स्पर्धांचा जागतिक स्पर्धांच्या यादीत समावेश करण्यात आला आहे. आंतरराष्ट्रीय क्रिकेट परिषदेने अहवालात म्हटले आहे, की २०२९मध्ये जागतिक कसोटी अजिंक्यपद स्पर्धेचा अंतिम सामना ८ ते १२ जूनदरम्यान इंग्लंडमध्ये होईल. ‘२०२७ आणि २०३१ वन-डे वर्ल्ड कपदरम्यान पुरुषांच्या १२, महिलांच्या सात आणि १९ वर्षांखालील गटाच्या पात्रतेसह पाच स्पर्धा आयोजित केल्या जातील,’ असेही आयसीसीने म्हटले आहे.

जगज्जेती पेरेस निलंबित

मोनॅको : बंदी असलेल्या औषधांचे सेवन केल्यामुळे ऑलिम्पिक आणि जागतिक मॅरेथॉन विजेती पेरेस जेपचिरचिर हिला तात्पुरते निलंबित करण्यात आले आहे, असे ॲथलेटिक्स इंटिग्रिटी युनिटने शुक्रवारी सांगितले. जेपचिरचिरने २०२१मध्ये टोकियो ऑलिम्पिकमध्ये महिलांच्या मॅरेथॉनमध्ये सुवर्णपदक जिंकले होते. तिने गेल्या वर्षी जागतिक विजेतेपदही पटकावले होते. या ३३ वर्षीय केनियन धावपटूच्या नावावर अर्धमॅरेथॉनमधील जागतिक विक्रमही आहे. ‘सिडनी मॅरेथॉनमधील विजयापूर्वी केनियात घेण्यात आलेल्या उत्तेजक द्रव्य चाचणीत जेपचिरचिर दोषी आढळली,’ असे जागतिक ॲथलेटिक्सतर्फे उत्तेजक द्रव्य प्रकरणांची चौकशी करणाऱ्या एआययूने ‘एक्स’वरील पोस्टमध्ये म्हटले आहे.

मेघनाची निवृत्ती

नवी दिल्ली : भारताची आघाडीची फलंदाज एस. मेघना हिने शुक्रवारी क्रिकेटच्या सर्व प्रकारांमधून निवृत्तीची घोषणा इन्स्टाग्रामवरील पोस्टद्वारे केली. आंध्रच्या या ३० वर्षीय खेळाडूने नोव्हेंबर २०२२नंतर भारताचे प्रतिनिधित्व केलेले नाही. तिने तीन वन-डे आणि १७ टी-२० सामन्यांत भारताचे प्रतिनिधित्व केले.