संरक्षण सहकार्यावर मंथन

पंतप्रधान नरेंद्र मोदी आणि रशियाचे अध्यक्ष व्लादिमिर पुतिन यांच्यात शुक्रवारी १८व्या ब्रिक्स परिषदेच्या पार्श्वभूमीवर नवी दिल्लीत द्विपक्षीय चर्चा होणार आहे.

या महत्त्वपूर्ण बैठकीत भारत-रशिया संरक्षण सहकार्य, ‘एस-४००’ क्षेपणास्त्र प्रणालीचा पुरवठा, ब्रह्मोसची क्षमता वाढवणे आणि जागतिक समीकरणांवर सखोल चर्चा होईल, अशी माहिती रशियाचे प्रवक्ते दिमित्री पेस्कोव्ह यांनी दिली.

नवी दिल्लीतील भारत मंडपम येथे ११ ते १३ सप्टेंबर दरम्यान ब्रिक्स परिषद पार पडणार आहे. या पार्श्वभूमीवर भारत आणि रशियामध्ये द्विपक्षीय चर्चा होणार आहे.

रशिया भारताला २०२६पर्यंत करारातील उर्वरित दोन ‘एस-४००’ हवाई संरक्षण प्रणाली पुरवण्याची आपली बांधिलकी पूर्ण करील, असा विश्वास रशियाने व्यक्त केला आहे. सन २०१८मध्ये झालेल्या ५.४३ अब्ज डॉलरच्या करारांतर्गत या प्रणालींची डिलिव्हरी अंतिम टप्प्यात आहे. संरक्षणमंत्री राजनाथ सिंह यांच्या अध्यक्षतेखालील संरक्षण संपादन परिषदेने (डीएसी) भारतीय हवाई दलाच्या सक्षमीकरणासाठी अतिरिक्त ‘एस-४००’ यंत्रणा खरेदीला मान्यता दिली आहे.

याशिवाय रशिया भारतासोबत लष्करी तंत्रज्ञान आदान-प्रदानास आणि ‘सुखोई-३०’ विमानांची दुरुस्ती, सुखोई-५७ विमानांची विक्री व नवीन अणुऊर्जा प्रकल्पांवर चर्चा करण्यास उत्सुक असल्याचे सांगितले जाते.