मालमत्ता कर थकबाकी वसुलीसाठी पिंपळस ग्रामपंचायतने बंद असलेल्या ‘निसाका’कडे कायदेशीर तगादा लावला होता. परंतु, नोटीस देऊनही कारखाना प्रशासनाने चार कोटी २३ लाख ४० हजार २७५ रुपयांची थकबाकी भरली नाही. त्यामुळे सोमवारी दुपारी १ वाजता कारखान्याच्या मुख्य प्रवेशद्वाराला सरपंच, उपसरपंच आणि सदस्य आणि पंच यांच्या उपस्थित प्रशासनाने सील ठोकत नमुना ‘क’ ची मालमत्ता जप्तीची कारवाई करण्यासह मुख्य कार्यालयातील प्रमुखाची खुर्चीही जप्त केल्याची माहिती सरपंच निशा ताजने, उपसरपंच किरण आहेर यांनी दिली.
प्रांत कार्यालयावर आज मोर्चा
निसाका संघर्ष समिती व कामगार संघटना यांच्यावतीने निफाड प्रांत कार्यालयावर आज (दि. २६) धडक मोर्चा काढण्यात येणार आहे. सकाळी ११ वाजता जळगाव फाटा यशोरंग मंगल कार्यालय येथून मोर्चाला प्रारंभ होणार असून, कामगार, सभासदांनी उपस्थित राहण्याचे आवाहन करण्यात आले आहे.निफाड सहकारी साखर कारखान्यात मोठा भ्रष्टाचार झाल्याने तो बंद पडला आणि भ्रष्टाचार करणारे तुमच्या पक्षाशी किंवा तुमच्या युतीशी संबंधित असल्याने याचा तपास करून कारखाना आधी सुरू करावा, अशी विनंती मी संसद भवनात गृहमंत्री आणि केंद्रीय सहकारमंत्री अमित शहा यांना प्रत्यक्ष भेटून केल्याची माहिती शिवसेनेचे (ठाकरे गट) खासदार संजय राऊत यांनी माध्यमांशी बोलतांना दिली. केंद्राच्या एका समितीच्या बैठकीत माझी आणि अमित शहा यांची भेट झाली तेव्हा निफाड कारखान्याची सर्व कागदपत्रे मी त्यांना दिल्याचे राऊत म्हणाले. हा कारखाना ज्यांनी चालवायला घेतला ते लोक कोण आहेत? त्यांच्याकडे कोट्यवधी रुपये कुठून आले ? याचा शोध घ्यावा आदी मागण्या केल्याचे राऊत म्हणाले. पुढील महिन्यात कारखान्याच्या कामगारांसोबत पुन्हा भेट घेणार असल्याचे राऊत यांनी स्पष्ट केले.
