Pune Metro State Cabinet Approves Loan For New Routes
Pune News: पुणे मेट्रोच्या नव्या मार्गिकांसाठी कर्जहमी; राज्या सरकार कडून खर्चाला मान्यता
महाराष्ट्र टाइम्स•
Pune Metro News: पुण्यातील दळणवळण अधिक सुलभ करण्यासाठी राज्य मंत्रिमंडळाने मेट्रो आणि उपनगरीय रेल्वेसेवेच्या विस्तारासाठी महत्त्वपूर्ण निर्णय घेतले. मेट्रोच्या विविध मार्गिकांसाठी कर्ज उभारणीकरिता राज्य सरकारने हमी दिली आहे, तसेच पुणे-लोणावळा दरम्यान तिसऱ्या व चौथ्या मार्गिकेसाठी सरकारी हिस्सा देण्यास मान्यता देण्यात आली आहे. स्वारगेट-कात्रज मार्गावर दोन नवीन स्थानके उभारली जाणार आहेत.
म.टा. विशेष प्रतिनिधी, पुणे : पुण्यातील वाढत्या विस्ताराच्या दृष्टीने दळणवळण सुविधा अधिक सुलभ करण्यासाठी राज्य मंत्रिमंडळाने बुधवारी अनेक ठोस निर्णय घेतले. केंद्र सरकारने मंजुरी दिलेल्या दोन मार्गिकांसह अन्य मार्गिकांसाठी कर्जाची उभारणी करण्यासाठी हमी घेण्यास सरकारने मान्यता दिलीच; त्याशिवाय स्वारगेट-कात्रज मार्गिकेवर नव्याने दोन स्थानकांच्या खर्चाला मंजुरी देण्यात आली. पुणे-लोणावळा दरम्यानच्या तिसऱ्या व चौथ्या मार्गिकेसाठी सरकारी हिस्सा स्वीकारण्यावर मंत्रिमंडळाने शिक्कामोर्तब केले आहे.
शहरातील वाढत्या वाहनसंख्येला आळा घालण्यासाठी पुण्यात मेट्रोसह उपनगरीय रेल्वेसेवेचा विस्तार प्राधान्याने होण्याची गरज सातत्याने व्यक्त केली जात होती. ‘ महाराष्ट्र टाइम्स ’च्या ‘पुणे सुपरफास्ट’ या व्यासपीठावर मुख्यमंत्री देवेंद्र फडणवीस यांच्यासमोर त्याबाबतचे सादरीकरण करण्यात आले होते. पुण्याला अधिक गतिमान करण्यासाठी या पर्यायांना प्राधान्य देण्याचे राज्य सरकारने निश्चित केले असून, त्यादृष्टीने बुधवारच्या मंत्रिमंडळ बैठकीत दळणवळण सुविधेसाठी आवश्यक निर्णय घेण्यात आले.
मेट्रो विस्तारासाठी कर्ज हमी
पुणे मेट्रोच्या पिंपरी-चिंचवड ते निगडी मार्गाचे काम सुरू झाले आहे. स्वारगेट ते कात्रज दरम्यानच्या मार्गिकेचे काम लवकरच सुरू होणार आहे. वनाझ ते चांदणी चौक व रामवाडी ते विठ्ठलवाडी (वाघोली) दरम्यानच्या मार्गिकांना केंद्र सरकारने मान्यता दिल्याने या सर्व मार्गिकांसाठी वित्तीय कंपन्यांकडून अर्थसाह्य घेण्यासाठीची प्रक्रिया ‘महाराष्ट्र मेट्रो रेल्वे कॉर्पोरेशन’ने सुरू केली होती. त्यादृष्टीने वित्तीय संस्थांसोबत आवश्यक करारनामे पूर्ण करण्यासाठी सरकारने कर्जहमीवर शिक्कामोर्तब केले. पिंपरी ते निगडी व स्वारगेट ते कात्रज या मार्गिकांसाठी युरोपियन इन्व्हेस्टमेंट बँक (ईआयबी) व अन्य मेट्रो मार्गिकांसाठी ‘एशियन डेव्हलपमेंट बँक’ (एडीबी) यांच्याकडून कर्ज घेण्यात येणार आहे. याशिवाय, टप्पा-२ च्या विस्तारित मार्गांसाठी सरकारकडून कर्ज हमी निश्चित करण्यात आली.
